تیری یادیں ساتھ ہمارے، ہم تجھ پر نازاں

ہفتہ, 09 جولائی 2016 02:26

آنسو سب کے پونچھنے والا وہ جھلّا دیوانہ، آنسو دے کر چلا گیا وہ جادوگر متوالا-

کانٹوں کی بارش میں مرہم بانٹنے والا
تپتی دھوپ میں ٹھنڈی چھاؤں بانٹنے والا
گلیوں گلیوں پیار کی سرگم بانٹنے والا
چلا گیا وہ جھلاّ جوگی، دیوانہ، متوالا
میٹھے گیت سنانے والا
چلا گیا وہ جھلّا جوگی چلا گیا

دُکھ کی ہر آہٹ پر دل اُس کا روتا تھا
ہر دم آہیں بھرتا تھا، آنسو چُنتا تھا
جاگتا رہتا تھا، نہ جانے کب سوتا تھا
چلا گیا وہ جھلاّ جوگی، دیوانہ، متوالا
میٹھے گیت سنانے والا
چلا گیا وہ جھلّا جوگی چلا گیا

اونچ نیچ کی سب دیواروں سے اونچا تھا
اونچی اونچی سب دستاروں سے اونچا تھا
پیار ہی اُس کا دین دھرم تھا، پیار ہی تھا دل دار
پھول لُٹانے کا رسیا تھا، یہی تھا کاروبار
چلا گیا وہ جھلاّ جوگی، دیوانہ، متوالا
میٹھے گیت سنانے والا
چلا گیا وہ جھلّا جوگی چلا گیا

باہر سے اُجڑا اُجڑا پر اندر ہرا بھرا تھا
ایک انوکھی چھب تھی اس کی ایک نیا لشکارا
خالی جیب میں خواب سنہرے بھر رکّھے تھے
جھولی میں سب چاند ستارے بھر رکّھے تھے
مالا مال تھیں آنکھیں اُس کی، سینہ ماہ مثال
بولی اُس کی شہد بھری تھی، عزم تھا کوہ مثال
سارے خزانے دنیا کے اس کے آگے کنگال
چلا گیا وہ جھلاّ جوگی، دیوانہ، متوالا
میٹھے گیت سنانے والا
چلا گیا وہ جھلّا جوگی چلا گیا

کیسا عالی شان سفر تھا، سب دنیا حیراں
تیری یادیں ساتھ ہمارے، ہم تجھ پر نازاں
دُکھ نگری کے سینے میں آباد ہے تیرا نام
بھیگی آنکھوں سے ہم سب کرتے ہیں تجھے سلام
’’انسانوں سے پیار کا رستہ سدا رکھو آباد!‘‘
یاد رہے گا ہمیں ہمیشہ یہ تیرا پیغام
آنسو سب کے پونچھنے والا وہ جھلّا دیوانہ
آنسو دے کر چلا گیا وہ جادوگر متوالا
چلا گیا وہ جھلاّ جوگی، دیوانہ، متوالا
میٹھے گیت سنانے والا
چلا گیا وہ جھلّا جوگی چلا گیا

Read 794 times

Leave a comment

Make sure you enter the (*) required information where indicated. HTML code is not allowed.

Pakistanviews.org

pakistanviews.org stands as a website enlightening the masses with all information related to current affair, entertainment, sports, technology, etc. It has been brought into existence to ensure that voice of Pakistan reaches the masses. Ensuring that a true picture of Pakistan is portrayed in the right manner to the world. The website is to bring forth the real picture of Pakistan negating avenues of Terrorism and Non-State Acto