کراچی پولیس چیف آفس پر دہشت گردوں کے حملے کی سی سی ٹی وی فوٹیج نجی ٹی وی نے حاصل کرلی، جس میں مسلح دہشت گردوں کو راہداری میں گھومتے ہوئے دیکھا جاسکتا ہے۔
کراچی پولیس چیف آفس (کے پی او) پر جمعہ کی رات تین دہشت گردوں نے حملہ کیا جس کی سی سی ٹی وی فوٹیج سماء کو موصول ہوگئی۔
ویڈیو میں دہشت گردوں کو کراچی پولیس آفس کی راہداری میں دیکھا جاسکتا ہے، مسلح دہشت گردوں نے کے پی او کی پہلی منزل پر پوزیشن لیں، دہشتگردوں کے پاس بڑے ہتھیار بھی واضح دیکھے جاسکتے ہیں۔
ویڈیو کے مطابق دہشتگردوں نے بیگز پہن رکھے ہیں، پہلے ایک دہشتگرد آگے آیا پھر دیگر کو ہاتھ کے اشارے سے آگے بلایا۔
واضح رہے کہ گزشتہ روز ہونیوالے حملے میں رینجرز، پولیس اہلکاروں سمیت 4 افراد جاں بحق اور 15 سے زائد زخمی ہوئے تھے جبکہ فورسز کے آپریشن میں تینوں دہشت گرد مارے گئے تھے۔
