قرض دینے والی غیر قانونی ایپس ختم

سیکیورٹیز اینڈ ایکسچینج کمیشن آف پاکستان نے قرض دینے والی غیر قانونی ایپس ختم کردیں۔ 

جاری اعلامیہ میں ایس ای سی پی کا کہنا ہے کہ کمیشن نے قرض دینے والی ایپس سے متعلقہ شکایات ختم کرنے پر خصوصی زور دیا۔

اس میں کہا گیا کہ گوگل، پاکستان ٹیلی کمیونیکیشن اتھارٹی (پی ٹی اے)، فیڈرل انویسٹیگیشن ایجنسی (ایف آئی اے) کے اشتراک سے قرض دینے والی غیرقانونی ایپس ختم کیں۔
ایس ای سی پی کے مطابق آن لائن قرض دینے کےلیے نان بینکنگ کے معیارات کو بہتر کیا گیا۔ سرمایہ کاروں میں حقوق کی آگاہی کےلیے جمع پونجی کے نام سے پروگرام شروع کیا۔

اعلامیہ میں کہا گیا کہ اسٹاک مارکیٹ میں کاروباری عمل کی تیز نگرانی کا نظام متعارف کروانا اہم کامیابی ہے۔

اس میں ایس ای سی پی کا یہ بھی کہنا تھا کہ مرکزی گیٹ وے پورٹل کے قیام کی منظوری دی گئی۔ خودمختار رجسٹریشن کے نظام سے نئی کمپنیوں کی رجسٹریشن میں اضافہ ہوا۔

اعلامیہ میں بتایا گیا کہ رجسٹرڈ کمپنیوں کی تعداد ایک لاکھ 96 ہزار 805 ہو گئی۔

اس میں بتایا گیا کہ نان بینکنگ کے شعبے میں 35.9 فیصد اضافہ ہوا، انشورنس سیکٹر میں پالیسی اصلاحات کی وجہ سے ریونیو میں 34 فیصد اضافہ ہوا۔