7 اکتوبر کو یوم یکجہتی فلسطین منایا جائے گا
اسلام آباد: مسئلہ فلسطین پر متفقہ موقف اختیار کرنے کیلئے 7 اکتوبر کو یوم یکجہتی منایا جائے گا۔
وزیر اعظم شہباز شریف نے کہا کہ 7 اکتوبر کو مسئلہ فلسطین پر آل پارٹیز کانفرنس (اے پی سی) ہوگی۔ اس دن ملک بھر میں یوم یکجہتی بھی منایا جائے گا جس کا مقصد اسرائیل کے بدترین مظالم کا سامنا کرنے والے بے گناہ فلسطینی مردوں، عورتوں اور بچوں کے ساتھ اظہار یکجہتی کرنا ہے۔
یہ فیصلہ انہوں نے پاکستان پیپلز پارٹی کے چیئرمین بلاول بھٹو زرداری اور جماعت اسلامی کے امیر حافظ نعیم الرحمان کی قیادت میں جماعت اسلامی کے وفد سے وزیراعظم ہاؤس میں ملاقات کے دوران کیا۔
اجلاس میں یہ بھی فیصلہ کیا گیا کہ 7 اکتوبر کو فلسطینی عوام سے اظہار یکجہتی اور جاری اسرائیلی جارحیت کے خلاف احتجاج کے لیے ملک بھر میں عوامی اجتماعات اور سیمینارز منعقد کیے جائیں گے۔
آل پارٹیز کانفرنس کے انعقاد اور یوم یکجہتی کی تقریبات کی نگرانی کے لیے نائب وزیراعظم اور وزیر خارجہ اسحاق ڈار، شیری رحمان، خواجہ سعد رفیق اور نیئر بخاری پر مشتمل کمیٹی تشکیل دی گئی۔
