پورے پاکستان سے اس بار اپنے لیڈر کی کال پر لوگ نکلیں گے : پی ٹی آئی رہنما علی محمد

راولپنڈی: میں ایک بار پھر کہتا ہوں کہ بانی پی ٹی آئی کو باہر نکال کر بنی گالا جانے دیں،24 نومبر سے پہلے ہوش کے ناخن لے لیں

اڈیالہ جیل کے باہر میڈیا سے گفتگو میں علی محمد خان کا کہنا ہے کہ فارم 47 کی حکومت ایک سیاسی لاش ہے جسے شہباز شریف اٹھا کر چل رہے ہیں، میں ایک بار پھر کہتا ہوں کہ 24 نومبر سے پہلے ہوش کے ناخن لے لیں اور بانی پی ٹی آئی کو باہر نکال کر بنی گالا جانے دیں، بانی پی ٹی آئی نے کہا ہے کہ باہر آکر سیاسی انتقام نہیں لوں گا۔

علی محمد خان کا مزید کہنا تھا کہ بانی پی ٹی آئی چوبیس نومبر کے لیے پرعزم ہیں، میرے لیے یہ دن اتنا ہی اہم ہے جتنا چوبیس نومبر 2011 کو میرا تحریک انصاف میں شامل ہونا تھا، خیبر پختونخوا اس بار پرعزم ہے اور اس بار پنجاب بھی نکل رہا ہے۔

انہوں نے اپنے بیان میں مزید کہا کہ پورے پاکستان سے اس بار اپنے لیڈر کی کال پر لوگ نکلیں گے اور اوورسیز پاکستانیوں سے بھی درخواست کروں گا کہ آزادی کے لیے نکلیں، میں ووٹ کو عزت دے کر چلنے والا بندہ ہوں، 17 سیٹیں ن لیگ کی تھیں اور ایک سو سترہ ہماری تھیں۔

انہوں نے کہا کہ بانی پی ٹی آئی کو جیل میں ڈالے ہوئے ساڑھے چار سو دنوں سے زیادہ ہوگئے ان کا کیا قصور ہے، 24 نومبر کو باہر نکل کر پاکستان کی بہتری کے لیے کام کیا جائے گا۔