ریاست چھتیس گڑھ : بھارتی فورسز نے سرچ آپریشن کے نام پر اپنے ہی 10 شہری مار دیے

 ریاست چھتیس گڑھ میں بھارتی فوج نے سرچ آپریشن کی آڑ میں رواں برس 257 افراد کو قتل کیا

بھارتی میڈیا کے مطابق فوج کے ترجمان نے دعویٰ کیا ہے کہ مارے گئے 10 افراد علیحدگی پسند نکسل باغی تھے۔ جن کے قبضے سے کلاشنکوف سمیت بھاری اسلحہ برآمد ہوا۔

فوج کی جانب سے جاری بیان میں کہا گیا ہے کہ علی الصبح بھنڈارپدر کے جنگلاتی علاقے میں نکسل باغیوں کے ٹھکانے پر کارروائی کی گئی۔

بیان میں کہا گیا ہے کہ فائرنگ کے تبادلے میں 10 نکسل باغی مارے گئے جب کہ سیکیورٹی فورسز کے 2 اہلکار بھی زخمی ہوئے جن میں سے ایک کی حالت نازک ہے۔

بھارتی فوج نے دعویٰ کیا کہ سرچ آپریشن میں ہتھیاروں کا ایک بڑا ذخیرہ پکڑا گیا۔ رواں برس تاحال 257 نکسل باغی مارے گئے جب کہ 861 کو گرفتار کیا گیا اور 789 دیگر نے ہتھیار ڈال کر خود کو پولیس کے حوالے کردیا۔

بھارتی وزیر داخلہ امیت شاہ کا کہنا ہے کہ ریاست چھتیس گڑھ کو 2026 تک مکمل طور پر نکسلی باغیوں سے پاک کردیا جائے گا۔

دوسری جانب علاقہ مکینوں کا کہنا ہے کہ سیکیورٹی فورسز نے گرفتاری کے بعد ان افرد کو گولیاں مار کر لاشیں پھینک دیں۔