بھارتی خوبرو اداکارہ ترپتی ڈمری سب سے زیادہ سرچ کی جانے والی شخصیت بن گی
ترپتی ڈمری نے شاہ رخ، دپیکا اور عالیہ بھٹ کو بھی پیچھے چھوڑ دیا
آئی ایم ڈی بی کی سب سے زیادہ سرچ کی جانے والی شخصیات میں ترپتی نے پہلا نمبر حاصل کیا ہے
نٹرٹینمنٹ رینکنگ اور انفارمیشن کی ویب سائٹ آئی ایم ڈی بی نے 2024 کےلیے سب سے مشہور ہندوستانی فلمی شخصیات کی فہرست جاری کی ہے جس میں ترپتی ڈمری نے حیرت انگیز طور پر بالی ووڈ کنگ شاہ رخ خان، دیپیکا پڈوکون اور عالیہ بھٹ سمیت تفریحی دنیا کی کچھ مشہور شخصیات کو پیچھے چھوڑ کر سرفہرست مقام حاصل کیا ہے۔
انٹرنیٹ مووی ڈیٹا بیس (آئی ایم ڈی بی) کی سب سے زیادہ سرچ کی جانے والی ٹاپ ٹین شخصیات میں ترپتی ڈمری کے بعد، دوسرے نمبر پر دیپیکا پڈوکون، ایشان کھتر، شاہ رخ خان اور سوبھیتا دھولی پالا رہے، جبکہ شروری واگھ، ایشوریہ رائے اور سمانتھا روتھ پربھو بالترتیب چھٹے، ساتویں اور آٹھویں نمبر پر ہیں۔ فہرست میں عالیہ بھٹ اور پربھاس نے نویں اور دسویں پوزیشن حاصل کی ہے۔
آئی ایم ڈی بی نے اپنی انسٹاگرام پوسٹ میں ناموں کا اعلان کرتے ہوئے لکھا کہ ’’انتظار ختم ہوگیا! 2024 کے سب سے مشہور ہندوستانی ستارے پیش کررہے ہیں، جنھوں نے آئی ایم بی ڈی سرچ میں ہماری اسکرینوں کو روشن کیا۔ کیا آپ کے پسندیدہ ستاروں نے اس فہرست میں جگہ حاصل کی؟‘‘
View this post on Instagram
یہ درجہ بندی دنیا بھر میں آئی ایم بی ڈی کے ماہانہ 250 ملین سے زیادہ وزٹ کرنے والوں کے نتائج پر مبنی ہے۔
ترپتی ڈمری نے آئی ایم ڈی بی کی فہرست میں شامل ہونے پر تشکر کا اظہار کرتے ہوئے اس کامیابی کو اپنے مداحوں کا پیار قرار دیا۔ ترپتی نے کہا کہ ’’فہرست میں پہلے نمبر پر آنا واقعی ایک بہت بڑا اعزاز ہے۔ یہ پہچان میرے مداحوں کی ناقابل یقین حمایت اور ہر اس شخص کی محنت کا ثبوت ہے جس کے ساتھ مجھے تعاون کرنے کا اعزاز حاصل ہوا ہے۔ یہ میرے لیے ایک یادگار سال رہا ہے‘‘۔
یاد رہے کہ ترپتی ڈمری اپنی اور رنبیر کپور کی فلم ’’اینیمل‘‘ میں اپنے کردار کے بعد بہت زیادہ وائرل ہوئیں۔ اس کے بعد اداکارہ نے 2024 میں فلم ’’بیڈ نیوز‘‘، ’’وکی ودیا کا وہ والا ویڈیو‘‘ اور ’’بھول بھلیاں 3‘‘ جیسی ہٹ فلمیں دیں۔ ترپتی ڈمری ’’دھڑک 2‘‘ میں سدھانت چترویدی کے مقابل نظر آئیں گی۔
