بالی ووڈ کے 70 سالہ اداکار کم عمر اداکارہ کی محبت میں گرفتار
بالی ووڈ 70 سالہ اداکارگووند نام دیو 31 سالہ ساتھی اداکارہ کے ساتھ تعلقات کی وجہ سے شہ سرخیوں کا حصہ بن گئے
منفی کرداروں کے اداکار گووند نام دیو حال ہی میں اس وقت خبروں میں آئے جب ان کا نام 31 سالہ اداکارہ شیوانگی ورما کے ساتھ جوڑا گیا اور یہ خبریں گردش کرنے لگیں کہ گووند کم عمر ساتھی اداکارہ کی محبت گرفتار ہیں۔
یہ قیاس آرائیاں اس وقت شروع ہوئیں جب شیوانگی نے سوشل میڈیا پر 70 سالہ اداکار گووند کے ساتھ ایک تصویر شیئر کرتے ہوئے لکھا کہ ’محبت کی کوئی عمر نہیں ہوتی۔‘ یہ پوسٹ جنگل کی آگ کی طرح پھیل گئی اور وائرل ہونے کے بعد ان کے تعلقات کے بارے میں چہ مگوئیاں شروع ہوگئیں۔
View this post on Instagram
تاہم اب گووند نام دیو نے ان خبروں پر ردعمل دیتے ہوئے واضح کیا کہ ان کا شیوانگی ورما کے ساتھ تعلق صرف پیشہ ورانہ ہے کیونکہ وہ ایک ایسے پراجیکٹ پر کام کر رہے ہیں جس میں ایک زائد العمر شخص کو ایک کم عمر نوجوان لڑکی سے محبت ہوگئی ہے۔
منفی کرداروں کیلئے مشہور اداکار نے اسی تصویر کو دوبارہ شیئر کرتے ہوئے کہا کہ ان کی بیوی سودھا نام دیو ہی ان کی زندگی ہیں اور وہ ان کے علاوہ کسی اور سے محبت نہیں کرتے۔ گووند نے مزید وضاحت کی کہ یہ افواہیں ایک فلم کے پلاٹ کا حصہ ہیں۔
گووند نے اپنی پوسٹ میں لکھا: ’ یہ ریئل لائف نہیں صاحب ریل لائف ہے، میری زندگی میں صرف سودھا ہی اہم ہیں۔ وہ میری سانس ہیں، اور دنیا کی کوئی بھی دولت ان کے برابر نہیں ہوسکتی۔‘
یاد رہے کہ گووند نام دیو نے ’ستیہ‘، ’سنگھم‘ اور ’ڈاکو کوئین‘ جیسی مشہور فلموں میں ولن کے طور پر بہترین کردار ادا کیے ہیں، جنہیں شائقین نے بے حد پسند کیا اور آج بھی وہ اپنے کرداروں کیلئے مشہور ہیں۔
