وزیر اعظم نے استعفیٰ نہ دیا تو پھر اگلا فیصلہ کریں گے

اسلام آباد: مولانا کی وزیراعظم عمران خان کو مستعفی ہونے کے لئے 2دن کی مہلت

آزادی مارچ کے جلسے سے خطاب کرتے ہوئے مولانا نے کہا کہ وزیر اعظم عمران خان دودن میں استعفیٰ دیں ، دودن میں استعفیٰ نہ دیا تو پھر اگلا فیصلہ کریں گے

مولانا نے کہا کہ میدان سے کوئی نہیں ہلے گا ، فیصلہ عوام نے کرناہے کیونکہ عوام کے ووٹ پرڈاکہ پڑا ہے ،ادارے غیر جانبدار رہیں ۔عوام کا اجتماع اس بات پر قدر ت رکھتاہے کہ وزیراعظم کوگھر میں جاکر گرفتار کرلے ۔

فضل الرحمان نے کہا کہ اسلام آباد میں کسی ایک پارٹی کا اجتماع نہیں بلکہ یہ ساری قوم کا اجتماع ہے جو دنیا پر واضح کررہاہے کہ پاکستان پر حکمرانی کرنے کاحق پاکستا ن کے عوام کا ہے ، کسی ادارے کا عوام پر مسلط ہونے کا حق نہیں ہے ۔

انہوں نے کہا کہ میں اجتماع میں آنیوالے تمام کارکنوں ، تمام سیاسی جماعتوں کے قائدین کوخوش آمدید کہتا ہوں، یہ سنجیدہ اجتماع ہے اور پوری دنیا اس کوسنجیدگی سے لے ، ہم یہ فیصلہ کررہے ہیں کہ ہم اس ملک میں عدل پر مبنی نظام چاہتے ہیں جو انصاف پر مبنی ہوتوپھر عوام کاحق ہے کہ اس حوالے سے فیصلہ کرے ۔

مولانا نے کہا کہ یہ ربیع الاول کا مہینہ ہے ،اس مبارک مہینے میں ہم اجتماع کا آغاز کررہے ہیں، اس وقت ختم نبوت کے خلاف سازشیں کرنیوالے ، ناموس رسالت کے خلاف سازش کرنیوالے میدان میں اتر رہے ہیں اور پور ی قوم اس کا مقابلہ کرنے کیلئے اکٹھی ہوئی ہے ۔ انہوں نے کہا کہ ہمارا مطالبہ یہ ہے کہ 2018کو دھاندلی زدہ اور فراڈ الیکشن ہوئے تھے ،ہم نہ اس الیکشن کو تسلیم کرتے ہیں اور نہ اس کے نتیجے میں بننے والی حکومت کوتسلیم کرتے ہیں۔

دوسروں پر الزام لگاتے کہ تم نے کھایا ہے لیکن یہاں تو ساراٹبر ہی چورہے

انہوں نے کہا کہ ایک مطالبہ ہے کہ اس حکومت کوجاناہے ، اس حکومت کی نااہلی کے نتیجے میں معیشت تباہ ہوگئی ہے ، جس ملک کی معیشت بیٹھ جائے تو وہ ملک قائم نہیں رہ سکتا ۔ انہوں نے کہا کہ اگر معیشت بیٹھنے سے روس اپنا وجود برقرار نہیں رکھ سکتا تو پاکستان بھی اپنا وجودبرقرار نہیں رکھ سکتا ۔ انہوں نے کہا کہ حکومت نے کشمیر کوبیچاہے ، ہم سے کہا کہ کشمیر کی صورتحال خراب ہے ، سرحد پر ٹینشن ہے ، اس لئے اجتماع نہ کرو لیکن عجیب بات ہے کہ ایک طرف کہا جارہاہے کہ کشمیر کے معاملے پر بھارت کے ساتھ تناﺅ ہے اوردوسری طرف کرتارپور راہداری کے معاملے پر بھارت کے ساتھ دوستی کی پینگیں بڑھائی جارہی ہیں۔ انہوں نے کہا کہ عامی آدمی اس وقت کرب میں مبتلاءہے ، مائیں بچوں کو بیچنے پر مجبور ہیں، نوجوان خودکشیاں کرنے پر آگئے ہیں، رکشے والے رکشے جلانے پر اتر آئے ہیں۔ انہوں نے کہا کہ کیااب بھی ہم ان کو یہ سب کرنے کی اجازت دے دیں؟

فضل الرحمان کا کہنا تھا کہ ان کی جانب سے کہا گیا تھا پچاس لاکھ گھر بناکر دینگے لیکن پچاس لاکھ گھر گرا دیئے گئے ہیں۔ان کی جانب سے کہاگیا کہ ایک کروڑ نوکریاں دینگے لیکن بیس سے پچیس لاکھ نوجوانوں کو بیروز گار کردیا گیاہے ۔

انہوں نے کہا کہ جس وقت پاکستان بنا تھا تو قائد اعظم نے کہا تھا کہ ہم مغربی نظام معیشت تسلیم نہیں کرتے ، ہم قرآن وسنت کے مطابق معاشی نظام بنائیں گے ۔انہوں نے کہا کہ جب اسرائیل وجود میں آیا تواس کے وزیر اعظم نے اسرائیل کی پہلی خارجہ پالیسی میں کہا تھا کہ ہماری خارجہ پالیسی کی بنیاد پاکستان کاخاتمہ ہے اور پاکستان کی خارجہ پالیسی کی بنیاد یہ تھی کہ ہم نے فلسطینیوں کے ساتھ کھڑے رہنا ہے ۔ انہوں نے کہا کہ یہ اجتماع اعلان کررہاہے کہ کوئی مائی کا لعل عقیدہ ختم نبوت اور ناموس رسالت کو نہیں چھیڑ سکے گا

کہتے ہیں کہ یہ مذہب کارڈ استعمال کرتے ہیں لیکن پاکستان ہے تو اسلام ہے اور اسلام ہے تو پاکستان ہے ، کوئی مائی کا لعل اسلام کو پاکستان سے جدا نہیں کرسکتا ۔ انہوں نے کہا کہ کہتے ہیں کہ نواز شریف چور ہے، ہم کرپشن کاخاتمہ کررہے ہیں لیکن ورلڈ اکنامک فورم کی رپورٹ کے مطابق پاکستان میں پچھلے ایک سال میں کرپشن میں تین فیصد اضافہ ہواہے ، تم نے کرپشن میں اضافہ کیا ، تم چوروں کے چور ہو ، کفن کش کے بیٹے بن گئے ہو۔

انہوں نے کہا کہ حکومت اساتذہ ،ڈاکٹر ز ،وکلااور تاجروں کے حوالے سے اپنے فیصلے واپس لے اور ان کے تمام مطالبات تسلیم کئے جائیں۔ انہوں نے کہا کہ ہم ٹرین حادثے میں شہید ہونیوالے کیلئے دعائے مغفرت کرتے ہیں اور اس مطالبے کے ساتھ کہ یہ حادثہ تھا یا دہشت گردی تھی،اس بات کی بھی تحقیقات کی جائیں ۔ انہوں نے کہا تحریک انصاف پر فارن فنڈنگ کھانے کا الزام ہے ، دوسروں پر تو الزام لگاتے تھے کہ تم نے یہ کھایا ہے ، تم نے یہ کھایا ہے لیکن یہاں تو ساراٹبر ہی چورہے ۔انہوں نے کہا کہ سب اس میدان استقامت کے ساتھ رہیں اورکوئی یہاں سے نہیںہلے گا ، استقامت کے ساتھ رہناہے ، ان سے دودن میں استعفیٰ لیناہے اور اگر نہیں دیا تو پھر اسی میدان میں فیصلہ کرناہے کیونکہ عوام آپ ہیں اور آپ کے حق پر ڈاکہ پڑاہے ، ہم تمام سیاسی قائدین کے ساتھ رابطے میں ہیں