مسلم لیگ ن کے رہنما احسن اقبال پر بیرون ملک جانے پر پابندی عائد ہو گئی

اسلام آباد: وفاقی حکومت نے احسن اقبال کا نام ایگزٹ کنٹرول لسٹ (ای سی ایل) میں ڈال دیا۔

تفصیلات کے مطابق پاکستان مسلم لیگ ن کے رہنما احسن اقبال پر بیرون ملک جانے پر پابندی عائد ہو گئی، وزارت داخلہ نے احسن اقبال کا نام ای سی ایل میں شامل کر لیا۔

مسلم لیگ ن کے رہنما احسن اقبال کا نام ای سی ایل میں ڈالنے کی منظوری وفاقی کابینہ نے دی تھی۔

سابق وزیر داخلہ احسن اقبال پر نارووال اسپورٹس سٹی کمپلیکس ریفرنس میں فرد جرم عائد کی جا چکی ہے، تاہم انھوں نے دسمبر 2020 میں صحت جرم سے انکار کر دیا تھا۔

اس ریفرنس میں احسن اقبال کے شریک ملزم 73 سالہ آصف شیخ نے وعدہ معاف گواہ بننے کی درخواست بھی دائر کی تھی، جس میں انھوں نے کہا تھا کہ میں بیمار ہوں اور علاج کی غرض سے امریکا جانا چاہتا ہوں، سیکشن 26 کے تحت معاف کر کے مجھے کیس میں گواہ بنایا جائے۔

نیب راولپنڈی نے نومبر میں نارووال اسپورٹس سٹی کمپلیکس میں اختیارات کے غلط استعمال کے الزام میں احسن اقبال کے خلاف ریفرنس دائر کیا تھا، ریفرنس کے مطابق احسن اقبال نے اختیارات کا نا جائز استعمال کیا، منصوبے کے بجٹ میں اضافہ کرایا، پراجیکٹ 34.75 ملین سے 2994 ملین روپے تک پہنچایا گیا، پروجیکٹ پنجاب حکومت کا تھا لیکن وفاق کا پیسہ لگایا گیا۔

نارووال اسپورٹس سٹی پروجیکٹ نواز شریف کے دوسرے دور 1998میں شروع کیا گیا تھا، اس ریفرنس میں احسن اقبال، سابق ڈی جی اختر نواز، سرفراز رسول، آصف شیخ اور محمد احمد نامزد ہیں۔