کرونا وائرس: گزشتہ چوبیس گھنٹوں کے دوران مزید 78 افراد کی اموات

اسلام آباد: پاکستان میں کرونا وائرس کی وبا کی تیسری لہر زوروں پر ہے، گزشتہ چوبیس گھنٹوں کے دوران مزید 78 افراد انتقال کر گئے۔

نیشنل کمانڈ اینڈ آپریشن سینٹر سے جاری اعداد و شمار کے مطابق گزشتہ روز اٹھتر مریض جاں بحق ہوئے، جس کے بعد اموات کی مجموعی تعداد بڑھ کر 18 ہزار 993 ہوگئی ہے۔

این سی او سی کا کہنا ہے کہ گزشتہ 24 گھنٹوں کے دوران کرونا کے 37 ہزار 756 ٹیسٹ کیے گئے، جن میں سے مثبت آنے والے کیسز کی تعداد 3 ہزار 447 رہی، جب کہ 24 گھنٹوں میں کرونا کے ٹیسٹ مثبت آنے کی شرح 9.12 فی صد رہی۔

پاکستان میں کرونا وائرس کے مجموعی کیسز کی تعداد 8 لاکھ 61 ہزار 473 ہو گئی ہے، جن میں سے 7 لاکھ 62 ہزار 105 مریض صحت یاب ہو چکے ہیں۔

این سی او سی کے مطابق تشویش ناک مریضوں کی تعداد 4 ہزار 846 ہے، جب کہ ملک میں فعال کیسز کی تعداد 80 ہزار 375 تک پہنچ گئی، اب تک ملک میں 1 کروڑ، 22 لاکھ 28 ہزار 427 کرونا ٹیسٹ کیے جا چکے ہیں۔

کرونا وائرس سے سب زیادہ متاثرہ صوبہ پنجاب ہے جہاں کیسز کی تعداد 3 لاکھ 19 ہزار 365 ہو چکی ہے، صوبہ سندھ میں کیسز کی تعداد 2 لاکھ 92 ہزار 644 ہے۔