کراچی : نیب کراچی نے چیئرمین،ڈی جی نیب کے نام پر لوٹ مار کے معاملے کی تحقیقات میں سرکاری افسران و تاجروں کو شامل تفتیش کرلیا۔
تفصیلات کے مطابق چئیر مین اور ڈی جی نیب کے نام پر لوٹ مار کے معاملے پر نیب کراچی نے تحقیقات میں پچاس سے زائد سرکاری افسران اور تاجروں کو شامل تفتیش کرلیا۔
ذرائع کا کہنا ہے کہ ڈی جی نیب کے نام پر جعلساز خالد سولنگی کو رقم دینے والوں میں ایڈیشنل ہوم سیکرٹری عامر خورشید بھی شامل ہیں ، نیب کی طلبی پر عامر خورشید جواب دینے کے بجائے رخصت پر امریکہ چلے گئے۔
ذرائع نے بتایا کہ جعلساز خالد سولنگی اور اس کے بیٹے عامر حسین کو ڈسٹرکٹ فوڈ آفیسر بدین منور میرانی نے بھی رقم دی، اسپیشل ہوم سیکرٹری نے مقدمات سے بچنے کے لئے اسی لاکھ روپے جعلساز کو ادا کئے۔
ذرائع نے کہا ہے کہ عامر خورشید پر لیاری ڈویلپمنٹ اتھارٹی کے حوالے سے نیب میں تحقیقات جاری ہیں جبکہ فوڈ آفیسر منور میرانی نے پچاس لاکھ ادا کیے مزید تیس لاکھ ادا کرنے تھے۔
ذرائع کے مطابق تاجر رفیق قریشی نے بھی جعلساز گروہ کے سرغنہ خالد سولنگی کے گرفتار بیٹے عامر کو کروڑوں کی ادائیگی کی، خالد سولنگی اور اسکے بیٹے کے زیر استعمال چار سو سے زائد سم بھی نیب حکام نے برآمد کرلی ہیں۔
جعلساز خالد سولنگی کے بیٹے عامر کو گزشتہ ماہ لاہور سے گرفتار کیا گیا تھا ، خالد سولنگی اور اسکا گروپ نیب افسران بن کر سرکاری افسران اور بزنس مینوں کو بلیک میل کرکے رقم لیتے تھے۔
