سندھ میں لاک ڈاؤن کے نفاذ میں مزید سختی،منڈیوں کی بندش سے اجناس کے بحران کا امکان

کراچی : سندھ میں کورونا وائرس کے پھیلاؤ کے پیش نظر لگائے جانے والے لاک ڈاؤن کے اثرات سامنے آنا شروع ہوگئے، منڈیوں کی بندش سے اجناس کے بحران کا امکان ہے۔

اس حوالے سے ذرائع کا کہنا ہے کہ صوبہ سندھ میں لاک ڈاؤن کے نفاذ میں مزید سختی کردی گئی ہے جس کی وجہ سے کراچی سمیت اندرون سندھ اجناس کے بحران کا خدشہ پیدا ہوگیا ہے۔

ذرائع کے مطابق حکومت سندھ نے مکمل لاک ڈاؤن کا نفاذ جمعہ کے روز ہول سیل اجناس مارکیٹ پر بھی کردیا ہے، منڈیوں کے بند ہونے سے صوبے میں اجناس کی سپلائی بھی متاثر ہوگی۔

چیئرمین ہول سیل گروسرز ایسوسی ایشن عبدالرؤف کا کہنا ہے کہ اسسٹنٹ کمشنر گارڈن نے کل اجناس منڈی بند رکھنے کا حکم دیا ہے، اس سے پہلے کبھی لاک ڈاؤن میں بھی اجناس منڈی کو بند کرنے کا نہیں کہا گیا تھا۔

انہوں نے کہا کہ جوڑیا بازار سے ملک بھر کو اجناس اور کوکنگ آئل سپلائی کیا جاتا ہے، جمعہ کی مکمل بندش، ہفتے کو ہاف ڈے اور اتوار کو چھٹی کے باعث شہر میں اجناس کی سپلائی بری طرح متاثر ہوگی۔

چیئرمین ایسوسی ایشن کا کہنا ہے کہ کاروباری اوقات 8 سے کم کرکے 6 بجے کرنے سے پہلے ہی ہول سیل کا کاروبار مشکلات کا شکار ہے، اس اقدام سے پونے تین کروڑ آبادی کے شہر کراچی میں اجناس کی قلت پیدا ہوسکتی ہے۔