پریانکا چوپڑا کب شادی کررہی ہیں، والدہ نے بتادیا

ممبئی: نامور بالی ووڈ اداکارہ پریانکا چوپڑا کی شادی کو لے کر ان کے گھر والے ہی نہیں بلکہ ان کے مداحوں کو بھی بڑا اشتیاق ہے کہ وہ کب اور کس کے ساتھ شادی کے بندھن میں بندھ رہی ہیں۔سابق ملکہ حسن اور بالی ووڈ کی صف اول کی اداکارہ پریانکا چوپڑا ان دنوں اپنے کیرئیر کے عروج پر ہیں، پریانکا بالی ووڈ کے ساتھ ہالی ووڈ میں بھی اپنا سکہ جماچکی ہیں لیکن ان کے ان گنت چاہنے والوں کو ہمیشہ ان کی شادی کی فکر ستاتی رہتی ہے اور وہ یہ جاننے کے لیے بےتاب رہتے ہیں کہ ان کی پسندیدہ اداکارہ کب اور کس سے شادی کررہی ہیں اوراب پہلی بار پریانکا کی والدہ مدھو چوپڑا نے ان کی شادی کے حوالے سے خاموشی توڑتے ہوئے بتایا ہے کہ ان کی بیٹی کب بندھ رہی ہے شادی کے بندھن میں۔

بھارتی میڈیا کے مطابق پریانکا کی والدہ نے ایک ویڈیو انٹرویو کے دوران اپنی بیٹی کی شادی کے بارے میں بات کرتے ہوئے کہا کہ وہ پریانکا کی شادی کے بارے میں بہت فکرمند رہتی تھیں اور چاہتی تھیں کہ وہ جلد سے جلد اپنی زندگی میں سیٹل ہوجائے لیکن اب انہیں لگتا ہے کہ ان کی بیٹی اپنے کیرئیر میں بہت آگے بڑھ چکی ہے کہ اسے شادی کرنے کے لیے کمپرومائز کرنے کی ضرورت نہیں اور آج کل کے دور میں عمر اتنا بڑا مسئلہ نہیں، پریانکا بہت سمجھدار لڑکی ہے اسے میری یا کسی اور کی نصیحت کی کوئی ضرورت نہیں وہ اپنے فیصلے خود کرسکتی ہے اور جب وہ چاہے گی اس وقت شادی کرے گی۔

واضح رہے کہ پریانکا چوپڑا ان دنوں ہدایت کار سنجے لیلا بھنسالی کی فلم ’’گستاخیاں‘‘ میں کام کرنے سے انکارکرنے پرمیڈیا کی توجہ کا مرکز بنی ہوئی ہیں ، کہاجارہا ہے کہ پریانکا اور بھنسالی کے درمیان اختلافات کی وجہ سے پریا نکا نےفلم کرنے سے منع کیا تاہم پریانکا کی والدہ نے اختلافات کی تردید کرتے ہوئے کہا ہے کہ تاریخوں کے مسائل کی وجہ سے ان کی بیٹی نے فلم میں کام کرنے سے منع کیا۔