بالی ووڈ کنگ کا بیٹی سہانا کے ساتھ پہلا اشتہار سوشل میڈیا پر وائرل
اشتہار شاہ رخ خان کے بڑے بیٹے آریان خان کے کلاتھنگ برانڈ کیلئے تیار کیا گیا ہے
بالی ووڈ کنگ شاہ رخ خان کا اپنی بیٹی اور اداکارہ سہانا خان کے ساتھ پہلا اشتہار سوشل میڈیا پر وائرل ہوگیا، یہ اشتہار اداکار کے بڑے بیٹے آریان خان کے کلاتھنگ برانڈ کے لیے تیار کیا گیا ہے۔
باپ بیٹی کی اس جوڑی نے آریان خان کے لگژری اسٹریٹ ویئر کلاتھنگ برانڈ ‘D’Yavol X’ کی نئی اشتہاری ویڈیو میں ساتھ کام کیا ہے جس کی ویڈیو کنگ خان نے اپنے آفیشل انسٹاگرام اکاؤنٹ پر پوسٹ کی۔
میگا اسٹار نے 8 مارچ کو خواتین کے عالمی دن کے موقع پر اشتہار کی ویڈیو انسٹاگرام پر پوسٹ کی، اشہار کا آغاز شاہ رخ خان کی انگوٹھیوں کے ساتھ ہوتا ہے جن پر برانڈ کا نام ہوتا ہے، چند سیکنڈ بعد برانڈ کا لوگو نظر آتا ہے اور پھر سہانا خان کی انٹری ہوتی ہے۔
سہانا خان جادوئی چھڑی سے D’yavol X کے بالکل ساتھ ‘ڈزنی’ کا لوگو بناکر دونوں برانڈ کے اشتراک کا اعلان کرتی ہیں اور پھر اپنے والد شاہ رخ خان کو دیکھ کر مُسکراتی ہیں۔
شاہ رخ خان نے ویڈیو پوسٹ کرتے ہوئے کہا کہ میرے لیے خواتین کے عالمی دن کے موقع پر اپنی بیٹی کے ساتھ اسکرین شیئر کرنا سب سے بہترین ہے اور میرے بڑے بیٹے نے بھی اپنا کام کر دیا ہے، میں تم دونوں سے پیار کرتا ہوں۔
View this post on Instagram
آریان خان کی تعریف کرتے ہوئے کنگ خان نے کہا کہ آریان! میں نے آپ کو مختصر وقت دیا تھا اور اس کے باوجود آپ نے بہترین کام کیا ہے، اُمید ہے کہ آپ کا برانڈ D’yavol X کامیابی کی اونچی اُڑان بھرے گا۔
آریان خان نے 2023 میں 30 اپریل کو اپنے برانڈ کا آغاز کیا تھا، اُن کے برانڈ نے بڑے پیمانے پر توجہ حاصل کی تھی اور اُن کی تمام کلیکشن تیزی سے فروخت ہوئی تھی۔
شاہ رخ خان نے اپنے بیٹے کے لگژری برانڈ کے لیے ماڈلنگ کی تھی، اُنہوں نے آریان کے برانڈ کی چمڑے کی جیکٹ پر آٹوگراف دیا تھا جس کی قیمت بھارتی 2 لاکھ روپے سے زیادہ تھی۔
