اجے دیوگن اور اکشے کمار کی بڑی اسکرین پر واپسی

بالی وڈ کے دو سپر اسٹارز، اجے دیوگن اور اکشے کمار، ایک بار پھر ایک ساتھ بڑی اسکرین پر نظر آئیں گے

اجے دیوگن، جو کئی کامیاب فلموں کی ہدایتکاری کر چکے ہیں، اب اکشے کمار کو اپنی اگلی فلم میں ڈائریکٹ کریں گے۔ اس بات کا اعلان دونوں اداکاروں نے ہندوستان ٹائمز لیڈرشپ سمٹ 2024 کے دوران کیا۔

اجے دیوگن نے تصدیق کرتے ہوئے کہا، "ہم پہلے ہی اس پروجیکٹ پر کام کر رہے ہیں، جہاں میں ہدایتکاری کروں گا اور اکشے فلم کا حصہ ہوں گے۔” تاہم، انہوں نے فلم کی کہانی یا نوعیت کے بارے میں کچھ بتانے سے گریز کیا اور کہا، "ابھی کچھ کہنا قبل از وقت ہوگا۔”

اکشے کمار نے اپنے مخصوص مزاحیہ انداز میں کہا، "میں خود اسکرپٹ بھیج دیتا ہوں!” جس پر حاضرین ہنس پڑے۔

اسی تقریب میں، اکشے کمار نے "ہیرا پھیری 3” پر بھی بات کی۔ انہوں نے مذاق کرتے ہوئے کہا کہ فلم کی شوٹنگ تب شروع ہوگی جب پروڈیوسر فیروز نادیادوالا کی "ہیرا پھیری” ختم ہوگی۔ تاہم، انہوں نے یہ بھی تصدیق کی کہ اس فلم کا کام آئندہ سال سے شروع ہو جائے گا۔

اجے دیوگن حال ہی میں اپنی سپر ہٹ فلم "سنگھم اگین” میں ایکشن سے بھرپور کردار میں نظر آئے اور اب وہ "ریڈ 2″، "دی دے پیار دے 2” اور "سن آف سردار 2” جیسے پروجیکٹس پر کام کر رہے ہیں۔ دوسری طرف، اکشے کمار بھی "ہاؤس فل 5″، "جولی ایل ایل بی 3″، "اسکائی فورس” اور "بھوت بنگلہ” جیسی فلموں کی تیاریوں میں مصروف ہیں۔