بالی ووڈ اداکار شاہد کپور معدے کے کینسر میں مبتلا؟
ممبئی: بالی ووڈ اداکار شاہد کپور کے بارے میں افواہیں گردش کررہی ہیں کہ وہ معدے کے کینسر میں مبتلا ہیں۔
بھارتی میڈیا رپورٹس کے مطابق بالی ووڈ اداکار شاہد کپور سے متعلق افواہیں گردش کررہی ہیں کہ وہ معدے کے کینسر میں مبتلا ہیں اور انہیں اسٹیج ون کینسر کی تشخیص ہوئی ہے۔
گزشتہ روز شاہد کپور فلم کبیر سنگھ کی شوٹنگ ادھوری چھوڑ کر سرجری کرانے دہلی روانہ ہوئے تھے یہ خبر سامنے آنے کے بعد ہی ان کے کینسر کی خبر جنگل کی آگ کی طرح پھیل گئی اور مداح تشویش کا شکار ہوگئے۔
دوسری جانب شاہد کپور کے گھر والوں نے انہیں کینسر کی ہونے کی خبروں کی تردید کردی ور کہا کہ کچھ لوگ کیسے یہ سب لکھ سکتے ہیں؟ آخر اس خبر کی نیاد کیا ہے اس طرح کی افواہیں پھیلانے کو کس طرح سے جائز ٹھہرایا جاسکتا ہے۔
شاہد کپور نے اہلیہ میرا راجپوت کے ساتھ ایک تصویر سوشل میڈیا پر شیئر کی ہے جس میں وہ دونوں خوشگوار موسم کو انجوائے کرتے ہوئے دکھائی دے رہے ہیں اور بالکل صحت مند ہیں۔
اداکار شاہد کپور ان دنوں اپنی نئی آنے والی فلم کبیر سنگھ کی شوٹنگ میں مصروف ہیں جو تیلگو بلاک بسٹر فلم ارجن ریڈی کا ہندی ری میک ہے جس میں ان کے ساتھ کائرا ایڈوانی مرکزی کردار ادا کررہی ہیں۔
واضح رہے کہ بالی ووڈ اداکار عرفان خان اور سونالی بیندرے کینسر جیسے موذی مرض میں مبتلا ہیں دونوں کا علاج جاری ہے، میڈیا رپورٹس کے مطابق اداکار رشی کپور کو بھی کینسر کی تشخیص ہوئی ہے جس کا علاج کرانے وہ نیویارک میں مقیم ہیں تاہم انہوں نے کینسر کی تصدیق یا تردید نہیں کی ہے۔
