کینسر کی افواہیں؟ رشی کپور کے بھائی نے خاموشی توڑ دی
ممبئی: بھارتی میڈیا میں گزشتہ برس سے یہ قیاس آرائیاں جاری ہیں کہ بالی ووڈ اداکار رشی کپور کو کینسر کا مرض لاحق ہوگیا اور وہ علاج کی غرض سے ہی امریکا میں موجود ہیں۔
تفصیلات کے مطابق بالی ووڈ کے نامور اداکار رشی کپور گزشتہ برس ستمبر کے آخر میں خاموشی سے علاج کی عرض سے امریکا روانہ ہوئے تھے جس کے باعث انہوں نے اپنی والدہ کی آخری رسومات میں بھی شرکت نہیں کی تھی۔
بھارتی میڈیا میں گزشتہ برس سے یہ خبریں زیر گردش ہیں کہ رشی کپور کینسر کے مرض میں مبتلا ہیں اور اُن کی بیماری اب آخری اسٹیج پر پہنچ چکی ہے۔ افواہوں یا مبینہ جھوٹی خبروں کی ایک اہم وجہ یہ بھی ہے کہ اداکار یا اُن کے اہل خانہ نے بیماری سے متعلق مکمل طور پر خاموشی اختیار کی ہوئی ہے اور بالخصوص گھر والوں کو اداکار نے تاکید کی کہ وہ اس ضمن میں میڈیا کو کچھ بھی آگاہی نہ دیں۔
گزشتہ برس ہی رشی کپور نے افواہوں کی تردید کرنے کے لیے اپنے ٹویٹر پر ایک ویڈیو شیئر کی جس میں اُن کا کہنا تھا کہ ’میں اس وقت نیویارک کے علاقے مینہٹھن میں اپنے پرانے دوست انوپم کھیر کے ساتھ سیر و تفریح کررہا ہوں‘۔
دوسری جانب رشی کپور کی صاحبزادی ردہما نے بھی بھارت سے امریکا پہنچنے کے بعد میڈیا سے گفتگو کی اور والد کی بیماری کے حوالے سے خاموشی توڑ دی تھی۔
اُن کا کہنا تھا کہ ’والد کی طبیعت بالکل ٹھیک ہے اور وہ روٹین کے چیک اپ کی وجہ سے امریکا میں موجود ہیں‘۔ انہوں نے مداحوں کو بھی یقین دلایا کہ گھبرانے کی کوئی بات نہیں لیجنڈری اداکار بالکل صحت مند ہیں۔
چار روز قبل بیماری کے حوالے سے جاری قیاس آرائیوں نے ایک بار پھر تقویت اُس وقت اختیار کی کہ جب نیتو کپور نے سماجی رابطے کی ویب سائٹ پر اپنی فیملی کی ایک تصویر شیئر کی جس میں انہوں نے ’کینسر‘ کا ذکر کیا۔
اس ضمن میں جب بھارتی میڈیا نے لیجنڈری اداکار کے بھائی راندھیر کپور سے رابطہ کیا تو انہوں نے صاف جواب دینے کے بجائے ٹال مٹول سے کام لیا اور کہا کہ ’رشی کپور کی طبیعت اب پہلے سے بہت بہتر ہے‘۔
اُن کا کہنا تھا کہ ’افواہیں پھیلانے والوں کے پاس کوئی ثبوت نہیں ہے تو وہ ایک تصویر کی بنیاد پر کینسر جیسی بیماری کا دعویٰ کررہے ہیں جبکہ رشی کپور بالکل ٹھیک ہیں، وہ روز کھانا کھاتے ہیں اور فیملی کے ساتھ امریکا میں اچھا وقت گزار رہے ہیں‘۔
راندھیر کپور کا کہنا تھا کہ ’ہم بھائی سمیت سب لوگ جلد بھارت واپس آئیں گے‘۔
واضح رہے کہ راج کپور کی اہلیہ کرشنا راج کپور اداکار کی والدہ تھیں جو گزشتہ برس دنیائے فانی سے کوچ کرگئی تھی اُن کی آخری رسومات بھارت میں ہوئیں جن میں رشی کپور اور اہل خانہ امریکا میں موجودگی کے باعث شرکت نہیں کرسکے تھے۔
رشی کپور نے 29 ستمبر کو سماجی رابطے کی ویب سائٹ پر ایک ٹویٹ کے ذریعے مطلع کیا تھا کہ وہ علاج کی غرض سے اپنے اہل خانہ کے ہمراہ امریکا جارہے ہیں۔
