عرفان خان کی بھارتی فلم انڈسٹری سے دوری کو ایک سال بیت گیا

ممبئی: بالی ووڈ اداکار عرفان خان کی انڈسٹری سے دوری کو ایک سال بیت گیا اور اگلے ایک سے ڈیڑھ سال تک ان کا کسی بھی فلم میں کام کرنے کا کوئی امکان نہیں۔ اداکار عرفان خان کو آنتوں کے کینسر اور لندن میں علاج کی وجہ سے بالی ووڈ سے دوری کو ایک سال بیت چکا تاحال ان کا علاج جاری ہے لیکن کچھ دنوں سے یہ خبریں بھی سامنے آرہی تھیں کہ وہ علاج سے کچھ مختصر چھٹی لے کر واپس آرہے ہیں۔رپورٹس میں یہ بھی کہا جارہا تھا کہ عرفان خان واپس آکر اپنی مشہور فلم ’ہندی میڈیم‘ کے سیکوئل کی شوٹنگ کریں گے لیکن فلم ’ہندی میڈیم‘ کے ہدایت کار نے ان اطلاعات کو افواہ قرار دے دیا۔

ہدایت کار سکیت چوہدری نے کہا کہ عرفان خان آہستہ آہستہ صحت یاب ہو رہے ہیں، وہ فلم کی شوٹنگ کے لیے واپس نہیں آرہے ہیں کیوں کہ اْن کی بیماری کا عمل انتہائی سست اور حساس ہے ان کے مکمل ٹھیک ہو جانے کے بعد بھی انہیں ایک سال تک کام کرنے نہیں دیا جائے گا اس لیے سوال ہی پیدا نہیں ہوتا کہ وہ مستقبل قریب میں کسی فلم میں کام کرسکیں۔واضح رہے کہ نامور بالی ووڈ اداکار عرفان خان نیورو اینڈو کرائن ٹیومر نامی بیماری میں مبتلا ہونے کی وجہ سے علاج کے لیے اپنی فیملی کے ہمراہ لندن میں مقیم ہیں انہوں نے فلم ’ہندی میڈیم‘ میں پاکستانی اداکارہ صبا قمر کے ساتھ مرکزی کردار ادا کیا تھا۔