موجودہ امپورٹڈ حکومت کو جانا ہی ہے : فواد چوہدری

اسلام آباد : موجودہ حکومت خود نہیں جائے گی تو نکالا جائے گا

سابق وفاقی وزیر اطلاعات فواد چوہدری کا کہنا ہے کہ موجودہ امپورٹڈ حکومت کو جانا ہی ہے، یہ لوگ خود نہیں جائیں گے تو نکالے جائیں گے۔

سماجی رابطے کی سائٹ ٹوئٹر پر جاری سلسلہ وار بیان میں فواد چوہدری نے کہا کہ معاملات پیچیدہ کرنے کے بجائے سیاسی جماعتیں الیکشن کمیشن کی تشکیل نو کریں اور بنیادی اصلاحات پر آگے بڑھیں۔

انہوں نے کہا کہ بہتر تھا جون کے پہلے ہفتے میں اسمبلیاں تحلیل کر کے نئے انتخابات منعقد کرائے جاتے، نادانوں کی رائے ہمیشہ چپکے رہنے کی ہوتی ہے اور اب بھی یہی ہو رہا ہے۔

ان کا یہ بھی کہنا تھا کہ عقل کی بات کئی دفعہ دیر سے سمجھ آتی ہے، نکالے جانے کے عمل میں معیشت کو اور نقصان پہنچا کر امپورٹڈ حکومت کس کی خدمت کرنا چاہتی ہے؟۔

فواد چوہدری نے کہا کہ عملی طور پر حکومت ختم ہو چکی ہے، حقیقت کا ادراک کریں اور عوام کو فیصلہ کرنے دیں۔