اداروں سے کوئی جھگڑا نہیں ، وطن کے لیے کفن پہننا پڑا تو پہنیں گے

راولپنڈی: نسلی اور اصلی مقابلے کے وقت کھڑا ہوتا ہے، جتنے مرضی کنٹینر لگا لو، اسلام آباد میں داخل ہوں گے

شیخ رشید نے میڈیا سے گفتگو میں وفاقی وزیر داخلہ پر الزام عائد کرتے ہوئے کہا کہ رانا ثناء اللہ حالات خراب کرنے کی کوشش کر رہا ہے، میرے مرنے پر رانا ثناء اللہ کو شامل تفتیش کیا جائے اور ملوث ہونے پر ان کے خلاف مقدمہ درج کیا جائے، چودھری پرویز الٰہی نوٹس لیں کہ ایف آئی اے پنجاب کے تھانوں میں کیا کررہی ہے۔

سربراہ عوامی مسلم لیگ نے کہا کہ نسلی اور اصلی مقابلے کے وقت کھڑا ہوتا ہے، جتنے مرضی کنٹینر لگا لو، اسلام آباد میں داخل ہوں گے، وطن کے لیے کفن پہننا پڑا تو پہنیں گے، چھوٹا آدمی بڑے گھر میں آگیا ہے، ایک بھی لاش گری تو ایک بھی نہیں بھاگ سکے گا۔

شیخ رشید نے کہا کہ عمران سے بیٹھ کر بات کریں، آپ اقتدار کے بھوکوں کے آڑھتی ہیں، اداروں سے کوئی جھگڑا نہیں، عمران خان کو کہا ہے کہ گجرات سے جوائن کروں گا اور پنڈی داخلے کا راستہ بناؤں گا، عمران خان سے درخواست کر سکتا ہوں کہ مذاکرات انتخاب کی تاریخ پر کرنے چاہئیں۔

انہوں نے کہا ہے کہ میں ایک سیٹ کی سیاست کرتا ہوں، 60 سال سے اسی سیٹ پر الیکشن لڑ رہا ہوں، میں نے بڑی جیلیں دیکھی ہیں، میرا کورٹ مارشل ہوا، فوجی عدالت نے مجھے ایک سال اور 20 کوڑوں کی سزا دی، کوڑے معاف ہو گئے، میری سیاست عمران خان کے ساتھ ہے۔

ان کا کہنا تھا کہ بدھ کو بتا دوں گا کہ ہم نے مارچ کا روات میں استقبال کرنا ہے یا کسی اور مقام پر، اگر میں نہ ہوا تو راشد شفیق ہوں گے، اگر راشد شفیق نہ ہوئے تو ہمارا ایک ایک کارکن عمران خان کے ساتھ پہرہ دے گا، یہ قومی غیرت کا سوال ہے جو نسلی اور اصلی ہوتے ہیں وہ مقابلے کے وقت بھاگتے نہیں۔

شیخ رشید نے کہا کہ اچھا تھا ندیم انجم پردے میں تھے، ڈی جی آئی ایس پی آر بڑا ادارہ ہے، ان کا کردار سب کو میز پر لانے کا ہے، گندی نالے کی اینٹیں محل میں نہیں لگ سکتیں، عالمی ایجنڈا ہے کہ فوج کو بدنام اور انتشار پیدا کیا جائے، اسلام آباد ہائیکورٹ میں ضمانت دائر کرنے جا رہا ہوں۔