جنوبی افریقا نے بھارت کو 5 وکٹوں سے شکست دے دی

پرتھ: ٹی ٹوئنٹی ورلڈ کپ میں جنوبی افریقا نے بھارت کو 5 وکٹوں سے شکست دے دی۔

جنوبی افریقا کی جیت کے ساتھ ہی پاکستان کا ٹی ٹوینٹی ورلڈکپ میں اگلے مرحلے میں سفر ختم ہوگیا۔

بھارت نے جنوبی افریقا کے خلاف ٹاس جیت کر بیٹنگ کا فیصلہ کیا اور مقرر 20 اوورز میں 9 وکٹوں کے نقصان پر 133 رنز بنائے۔

بھارتی بلے بازوں کو جنوبی افریقی بولرز کے مقابلے میں مشکلات کا سامنا رہا، بھارت کی وکٹیں یکے بعد دیگرے پتوں کی طرح بکھرتی چلی گئیں،بھارت کی جانب سے سوریا کمار یادیو کے علاوہ کوئی بھی وکٹ پر نہ ٹھہر سکا، سوریا کمار یادیو نے68 رنز کی اننگز کھیلی، ان کے علاوہ کپتان روہت شرما 15 اور ویرات کوہلی نے 12 رنز بنائے۔

جنوبی افریقا کی جانب سے  لنگی نگدی نے 4 اور  وین پارنیل نے 3 وکٹیں حاصل کیں۔

جنوبی افریقا نے 134 رنز کا ہدف 20 ویں اوور کی چوتھی گیند پر پورا کرلیا، جنوبی افریقا کی جانب سے ایڈن مارکرم نے 52 رنز کی اننگز کھیلی، ٹمباباووما 10 اور ٹریسٹن اسٹبس نے 6 رنز بنائے، کوئنٹن ڈی کوک ایک رن اور رائیلی روسو صفر پر آؤٹ ہوئے جب کہ ملر نے 56 رنز کی ناقابل شکست اننگز کھیلی۔

بھارت کی جانب سے ارشدیپ سنگھ نے 2 کھلاڑیوں کو آؤٹ کیا،محمد شامی،  پانڈیا اور روی چندرن ایشون نے ایک ایک وکٹ حاصل کی۔