بلدیاتی انتخابات میں تاخیر سے متعلق سندھ ہائیکورٹ نے تحریری فیصلہ جاری کردیا

کراچی: الیکشن کمیشن 15 دن میں کراچی، حیدرآباد میں بلدیاتی الیکشن کا شیڈول جاری کرے

بلدیاتی انتخابات میں تاخیر سے متعلق سندھ ہائیکورٹ نے تحریری فیصلہ جاری کردیا۔

عدالت کا تحریری فیصلے میں کہنا ہے کہ عدالت الیکشن کمیشن کو مجبور نہیں کرسکتی ہے، لیکن الیکشن کمیشن 15 دن میں الیکشن کا شیڈول جاری کرے، الیکشن کمیشن 3 دسمبر تک بلدیاتی انتخابات کے شیڈول کا اعلان کرے، الیکشن کمیشن تمام بلدیاتی انتخابات سے متعلق 60 روز میں تمام اقدامات مکمل کرے۔

تحریری فیصلے کے مطابق بلدیاتی انتخابات کی تاریخ 2ماہ کے اندر اندر ہونی چاہیے، حکومت سندھ بلدیاتی انتخابات کیلئے سیکورٹی سمیت تمام سہولیات فراہم کرنے کی پابند ہے، چیف سیکریٹری سندھ اور آئی جی سندھ تمام ضروری اقدامات کے پابند ہوں گے۔

عدالت کا کہنا تھا کہ ایم کیو ایم کی جانب سے حلقہ بندیوں کے حوالے سے الیکشن نہ کرانے کی تجویز دی گئی، اس سے قبل بھی ایم کیو ایم کی انتخابات ملتوی کرنے کی درخواست مسترد ہوچکی ہے، ایم کیو ایم کی درخواستوں میں ایسا ٹھوس مؤقف نہیں ہے، ایم کیو ایم کے مؤقف میں اتنی جان نہیں ہے جس کی بنیاد پر الیکشن ملتوی کیے جائیں۔