وفاقی تحقیقاتی ادارے ایف آئی اے نے غداری کے مقدمے میں شوکت ترین کو اشتہاری قرار دینے کی کارروائی شروع کردی۔
پاکستان تحریک انصاف کے سنیٹر شوکت ترین کے خلاف بغاوت کے مقدمے میں بڑی پیش رفت ہوئی ہے۔
ایف آئی اے نے شوکت ترین کو اشتہاری قرار دینے کی کارروائی شروع کردی ہے، جس کے بعد ایف آئی اے شوکت ترین کی گرفتاری کے لیے اقدامات کرے گا۔ سابق وزیر خزانہ کی گرفتاری کے لیے انٹرپول سے مدد لی جائے گی۔
معاملے کا پس منظر
22 ستمبر 2022 کو سابق وزیرخزانہ شوکت ترین کی ایک مبینہ آڈیو لیک ہوئی جس میں وہ اس وقت کے پنجاب کے وزیر خزانہ محسن لغاری اور خیبرپختونخوا کے وزیر تیمور جھگڑا سے الگ الگ گفتگو کررہے تھے۔
مبینہ آڈیو کال میں شوکت ترین نے دونوں رہنماؤں کو آئی ایم ایف معاہدے کے تناظر میں وفاقی حکومت کو جواب دینے کے بارے میں مشورے دیئے تھے۔
مبینہ ٹیلفونک گفتگو میں سابق وزیر خزانہ شوکت ترین نے کہا کہ یہ جو آئی ایم ایف کو 750 ارب روپے کی کمٹمنٹ دی ہے آپ سب نے سائن کیا ہے، حکومت پردباؤ ڈالنے کیلئے آئی ایم ایف سے کہا جائے کہ آپ سے کمٹمنٹ سیلاب سے پہلے کی تھی، اب ہم سیلاب متاثرین پر پیسے خرچ کررہے ہیں، اس لئے ہماری لئے مشکلات ہوسکتی ہے۔
شوکت ترین نے صوبائی وزیرخزانہ کو زور دیتے ہوئے کہا کہ آپ نے اب آئی ایم ایف کو لکھنا ہے کہ اب ہم یہ کمٹمنٹ پوری نہیں کر پائیں گے، بس یہی لکھنا ہے آپ نے اور کچھ نہیں کرنا۔
صوبائی وزیرخزانہ محسن لغاری نے شوکت ترین سے دریافت بھی کیا کہ کیا اس سے ریاست کومشکل نہیں ہوگی۔
جس پر شوکت ترین نے پارٹی مفاد کو ترجیح دیتے ہوئے کہا کہ حکومت ہمارے چئیرمین سے کس طرح ٹریٹ کررہی ہے، یہ تو نہیں ہوسکتا کہ وہ ہم پر کیسز کرتے رہیں، بلیک میل کرتے رہیں اور ہم ان کی مدد کرتے رہیں۔
13 فروری کو ایف آئی اے سائبرکرائم ونگ نے شوکت ترین کے خلاف آڈیو لیکس پر مقدمہ درج کیا تھا۔
شوکت ترین کے خلاف مقدمہ بغاوت اور عوام میں شرانگیزی پھیلانے کے الزام کے تحت درج کیا گیا۔
