ملک عامر ڈوگر نے اسپیکر قومی اسمبلی کو خط بھجوایا : قائد حزب اختلاف کی تبدیلی کا مطالبہ

قومی اسمبلی میں قائد حزب اختلاف کی تبدیلی کے لیے پی ٹی آئی متحرک ہوگئی۔

پاکستان تحریک انصاف کے چیف وہپ ملک عامر ڈوگر نے اسپیکر قومی اسمبلی کو خط بھجوایا ہے، جس میں اپوزیشن لیڈر کی فوری تبدیلی کا مطالبہ کیا گیا ہے۔

عامر ڈوگر نے اسپیکر قومی اسمبلی کے نام خط میں لکھا ہے کہ عدالت نے بیس فروری کا پی ٹی اراکین ڈی نوٹیفائی کرنے کا فیصلہ معطل کردیا ہے۔ اسپیکر فوری طور پر قائد حزب اختلاف کی تبدیلی کے عمل کا آغاز کریں۔

خط میں مزید کہا گیا ہے کہ اپوزیشن کی سب سے بڑی جماعت ہونے کے ناطے قائد حزب اختلاف پی ٹی آئی کا استحقاق ہے۔

عامر ڈوگر نے کہا ہے کہ چیئرمین نیب کے استعفے کے بعد نئی تقرری پی ٹی آئی کے نئے قائد حزب اختلاف سے مشاورت کے ذریعے ہی ممکن ہے۔ چئیرمین تحریک انصاف کی ہدایات پر اس خط کے ذریعے آپ سے قائد حزب اختلاف کی فوری تبدیلی کا مطالبہ کر تا ہوں۔