شاہ محمود قریشی سمیت پی ٹی آئی رہنماؤں کو 30 روز کے لیے نظر بند کیا گیا

تحریک انصاف کے رہنماؤں کی بازیابی کی درخواستیں پر محکمہ داخلہ پنجاب اور جیل حکام نے لاہور ہائی کورٹ میں رپورٹ عدالت میں جمع کروا دی۔

عدالت میں پیش کی گئی رپورٹ کے مطابق تحریک انصاف کے 9 رہنماؤں کو 30 دن کے لیے پنجاب کی مختلف جیلوں میں نظر بند کیا گیا ہے۔ نظربند 9 افراد نے روڈ بلاک اور امن و امان کی صورت حال کو خراب کرنے کی کوشش کی۔

نظر بندی کےاحکامات ڈی سی لاہور رافعہ حیدر نے جاری کیے ہیں، آئی جی جیل خانہ کی اجازت کے بعد 77 افراد کو پنجاب کی مختلف جیلوں میں منتقل کردیا گیا ہے۔

رپورٹ میں بتایا گیا ہے کہ شاہ محمود قریشی اٹک جیل، اسدعمر راجن پور اور عمر سرفراز چیمہ بھکر جیل میں نظربند ہیں۔

اس کے علاوہ ولید اقبال کو لیہ،اعظم سواتی کو رحیم یار خان ، مراد راس ڈی جی خان، محمد خان مدنی بہاولپور جب کہ اعظم خان نیازی اور احسن ڈوگر لیہ جیل میں نظربند ہیں۔