پاکستان سپر لیگ 8 میں کراچی کنگز کی چھٹی شکست

راولپنڈی : اس شکست کے بعد کراچی کنگز کے اگلے مرحلے میں جانے کے امکانات ختم ہوگئے۔

پاکستان سپر لیگ 8 کے 19 ویں میچ میں اسلام آباد یونائیٹڈ نے اعظم خان کی شاندار بیٹنگ کی بدولت کراچی کنگز کو 6 وکٹوں سے شکست دیدی۔

پہلے بیٹنگ کرتے ہوئے کراچی کنگز نے مقررہ 20 اوور میں 5 وکٹوں کے نقصان پر 201 رنز کا ٹوٹل اسکور بورڈ پر سجایا تھا۔

شرجیل خان صرف 8 رنز بنا کر رومان رئیس کی گیند پر بولڈ ہو گئے، روسنگٹن بھی 20 رنز بنا کر آؤٹ ہوئے جبکہ طیب طاہر 19 اور شعیب ملک 12 رنز بنا سکے۔

عماد وسیم 54 گیندوں پر 2 چھکوں اور 11 چوکوں کی مدد سے 92 رنز بنا کر ناٹ آؤٹ رہے جبکہ عرفان خان نیازی نے 30 رنز کی اننگز کھیلی۔

جواب میں اسلام آباد یونائیٹڈ نے اعظم خان کی شاندار بیٹنگ کی بدولت کراچی کنگز کو 6 وکٹوں سے شکست دیدی۔

یونائیٹڈ کی جانب سے اعظم خان ناٹ آؤٹ 72 رنز بنا کر نمایاں رہے۔ فہیم اشرف 41، ایلکس ہیلز 34، ریسی وین ڈر ڈوسین 22 اور کولن منرو 11رنز بنا کر آؤٹ ہوئے۔

آصف علی نے دو گیندوں پر 10 رنز بنا کر ٹیم کو فتح سے ہمکنار کرایا۔