عدالتوں پر تحریک چلانے سے پہلے موجودہ عدالتی کارروائیوں پر غور کریں ، وزیر قانون

وفاقی وزیر قانون اعظم نذیر تارڑ کا کہنا ہے کہ عدالتوں پر تحریک چلانے سے پہلے موجودہ عدالتی کارروائیوں پر غور کریں.

اسلام آباد میں پریس کانفرنس کے دوران وفاقی وزیر قانون اعظم نذیر تارڑ نے کہا کہ پی ٹی آئی حکومت میں اپوزیشن کو دیوار سے لگایا گیا، حکومتی پالیسیز کی وجہ سے عدالتوں پر دباؤ بڑھایا گیا، عدالت نے قومی اسمبلی کو بحال کیا، عمران خان نےعدالت پر یلغار کی اور فیصلہ ماننے سے انکار کردیا۔

وفاقی وزیر نے کہا کہ عمران خان نعرے لگاتے ہیں کہ انصاف کے لیے تحریک چلا رہے ہیں دوسری طرف آپ اس عدالت کی تضحیک کرتے ہیں، عمران خان نے ہمیشہ لاڈلے کے طور پر کامیابیاں حاصل کیں، عمران خان کو جمہوری طریقے سے عدم اعتماد سے ہٹایا گیا۔

اعظم نذیر تارڑ نے کہا کہ عمران خان عدالتوں کا تمسخر اڑاتے ہیں، عدالتیں نوٹس بھیجتی ہیں آپ اپنی مرضی سے حاضر ہوتے ہیں، مرضی سے جواب دیتے ہیں، وہ پیغام بھیجتے ہیں کہ ایک عمارت میں نہیں دوسری عمارت میں پیش ہوں گا ۔

وزیر قانون نے کہا کہ میاں نواز شریف کو انجینئرڈ طریقے سے وزارت عظمیٰ سے ہٹایا گیا، میاں نواز شریف نے انکساری کے ساتھ عدالتی کارروائی کا احترام کیا، وہ اپنی بیمار اہلیہ کو چھوڑ کر بیٹی کے ساتھ واپس آئے۔