عمران خان کو توہین عدالت کی درخواست پر نوٹس جاری

اسلام آباد ہائی کورٹ نے جوڈیشل کمپلیکس پیشی کے موقع پر عدالتی احکامات کی خلاف ورزی پر توہین عدالت کی درخواست پر چیئرمین تحریک انصاف عمران خان کو نوٹس جاری کر دیا۔

چیف جسٹس عامر فاروق نے اسسٹنٹ کمشنر عبداللہ کی توہین عدالت کی درخواست پر نوٹس جاری کیا۔ عدالت نے کیس کو فائل گمشدگی کیس کے ساتھ منسلک کردیا۔

عدالت،نے آئی جی اسلام آباد سے امن و امان کی صورتحال پیدا کرنے سے متعلق معاملے کی رپورٹ طلب کرلی۔ عدالت نے اسلام آباد انتظامیہ سے بھی رپورٹ طلب کر تے ہوئے سماعت 7 اپریل تک ملتوی کر دی۔

اسسٹنٹ کمشنرنے درخواست میں مؤقف اختیار کیا تھا کہ ہائی کورٹ نے عمران خان سے کہا تھا امن و امان کی صورتحال خراب نہ ہو مگر عمران خان نے عدالتی حکم کی خلاف ورزی کی۔ پی ٹی آئی کارکنوں کے پتھراؤ کی وجہ سے پولیس اہلکار زخمی ہوئے۔

پولیس نے عدالتی حکم کے مطابق سیکیورٹی انتظامات کیے تھے ۔عمران خان نے 17 مارچ کا عدالت کا ایک حکم بھی نہیں مانا۔ انہیں طلب کرکے قانون کے مطابق کارروائی کی جائے۔