جلاؤ گھیراؤ اور توڑ پھوڑ تحریک انصاف پر کریک ڈاؤن کا ایک منصوبہ تھا: عمران خان

لاہور: اخلاق و اقدار سے یکسر عاری بدمعاشوں، مجرموں اور احمقوں پر مشتمل ایک گروہ پوری طرح قوم پر حاوی ہوچکا ہے۔

اپنے ایک بیان میں عمران خان نے کہا کہ پُرامن مظاہرین پر پولیس کی فائرنگ کے نتیجے میں تقریباً 25 شہری شہید اور سیکڑوں زخمی ہوئے جس کی فوری تحقیقات ناگزیر ہیں۔

عمران خان نے کہا کہ فرانس میں (حالیہ) احتجاج کے دوران مظاہرین کو پولیس پر پٹرول بم تک پھینکتے دیکھا گیا مگر ایسا ہرگز نہیں ہوا کہ پولیس نے جواباً ان پر گولیاں برسائی ہوں، جلاؤ گھیراؤ اور توڑ پھوڑ یہ تحریک انصاف پر کریک ڈاؤن کا ایک سوچا سمجھا منصوبہ تھا جس کی قلعی کسی بھی آزادانہ تحقیقات میں کھل جائے گی۔
چیئرمین پی ٹی آئی نے کہا کہ پُرامن احتجاج کے ہمارے بنیادی حق کی سنگین خلاف وزریوں کا میڈیا پر جاری بحث سے ذکر ہی گول کر دیا گیا ہے اور اس پر کوئی گفتگو تک ہی نہیں کی جارہی اور نہ نہ ہی 25 پرامن پاکستانی مظاہرین کے قتل اور 600 کے قریب زخمیوں کے ذمہ داروں کی نشاندہی کے لیے کسی تحقیق کا کوئی ذکر سننے کو مل رہا ہے۔

قبل ازیں چئیرمین پی ٹی آئی عمران خان نے ٹوئٹر پر بیان میں کہا کہ اخلاق و اقدار سے یکسر عاری بدمعاشوں، مجرموں اور احمقوں پر مشتمل ایک گروہ پوری طرح قوم پر حاوی ہوچکا ہے۔ وقت آگیا ہے کہ پوری قوم اس کیخلاف آواز بلند کرے اس سے پہلے کہ بہت دیر ہوجائے۔

عمران خان کا مزید کہنا تھا کہ ملک تاریخ کی بلند ترین مہنگائی اور تیزی سے بڑھتی بےروزگاری کے ساتھ بدترین معاشی بحران کی دلدل میں دھنس رہا ہے۔ ان حالات میں اقتدار پر قابض گروہ اپنی تمام تر توانائیاں ملک کی سب سے بڑی اور وفاقی سطح کی واحد سیاسی جماعت کو جبر و فسطائیت سے کچلنے کی منصوبہ بندی پر مرکوز کئے ہوئے ہے۔