پاکستان آرمی کی طاقت پاکستان کے عوام ہیں : آرمی چیف

سانحہ 9 مئی میں ملوث مجرموں کے خلاف مقدمات کا قانونی عمل پاکستان آرمی ایکٹ اور آفیشل سیکرٹ ایکٹ کے تحت شروع ہو چکا ہے۔

آرمی چیف جنرل سید عاصم منیر نے شہداء کی یادگار پر پھولوں کی چادر چڑھائی اور مادر وطن کیلئے جانیں قربان کرنے والے شہداء کو زبردست خراج عقیدت پیش کیا، لاہور آمد پر کورکمانڈر لاہور نے چیف آف آرمی اسٹاف کا استقبال کیا۔

آرمی چیف جنرل سید عاصم منیر نے آج جناح ہاؤس لاہور کا دورہ کیا جہاں انہیں 9 مئی کے پرتشدد واقعات پر بریفنگ دی گئی، آرمی چیف جنرل سید عاصم منیر نے کہا ہے کہ فوج اور عوام کے درمیان دراڑ ڈالنے کی کوشش ناقابل برداشت اور ناقابل معافی ہے، پاکستان آرمی کی طاقت پاکستان کے عوام ہیں۔

کور ہیڈ کوارٹرز میں افسران اور جوانوں سے خطاب کرتے ہوئے آرمی چیف جنرل عاصم منیر نے کہا کہ سانحہ 9 مئی میں ملوث منصوبہ سازوں، اکسانے والوں، حوصلہ افزائی کرنے والوں اور مجرموں کے خلاف مقدمات کا قانونی عمل پاکستان آرمی ایکٹ اور آفیشل سیکرٹ ایکٹ کے تحت شروع ہو چکا ہے۔
آرمی چیف جنرل سید عاصم منیر نے کہا کہ دشمن قوتیں اور ان کے حامی جعلی خبروں اور پروپیگنڈے کے ذریعے انتشار پھیلانے کی بھرپور کوشش کر رہے ہیں لیکن دشمن کے ایسے تمام عزائم کو قوم کے تعاون سے ناکام بنایا جائے گا۔

آرمی چیف جنرل سید عاصم منیر نے سروسز ہسپتال لاہور کا بھی دورہ کیا اور 9 مئی کو سیاسی شرپسندوں کے ہاتھوں زخمی ہونے والے ڈی آئی جی علی ناصر رضوی کی خیریت دریافت کی۔

آرمی چیف نے لاہور قربان لائنز کا دورہ کیا اور پولیس افسران سے ملاقات کی، آرمی چیف نے پولیس شہداء کو خراج عقیدت پیش کیا، آرمی چیف نے پرتشدد مظاہروں میں پولیس کی تربیت اورتحمل کی اسٹریٹیجی کو سراہا اور پولیس سمیت تمام قانون نافذ کرنے والے اداروں کو مکمل معاونت کی یقین دہانی کرائی۔