وزیراعظم شہباز شریف اور ایم ڈی آئی ایم ایف کے درمیان ٹیلی فونک رابطہ

وزیراعظم شہباز شریف اور عالمی مالیاتی فنڈ کی ایم ڈی کرسٹیلینا جورجیوا کے درمیان ٹیلی فونک رابطہ ہوا ہے، آئی ایم ایف کے پروگرام کے حوالے سے امور پر تبادلہ خیال کیا گیا۔ وزیراعظم شہباز شریف اور ایم ڈی آئی ایم ایف کے درمیان رابطہ منگل کی صبح ہوا۔

ترجمان کے مطابق وزیراعظم نے معاشی صورتحال کی بہتری کے اہداف مشترکہ کوششوں سے حاصل کرنے کے عزم کا اعادہ کیا۔ وزیراعظم کا کہنا تھا کہ امید ہے پروگرام کے نکات پر ہم آہنگی ایک دو دن میں فیصلے کی شکل اختیار کرے گی۔

ایم ڈی آئی ایم ایف کرسٹیلینا جورجیوا نے کہا کہ پاکستان کی معاشی صورتحال کی بہتری چاہتے ہیں، آئی ایم ایف کی مینجنگ ڈائریکٹر نے وزیراعظم شہباز شریف کے قائدانہ عزم اور وزیرخزانہ اور انکی ٹیم کی پروگرام مکمل کرنے کیلئے کوششوں کو سراہا۔

خیال رہے کہ پاکستان عالمی مالیاتی فنڈ(آئی ایم ایف) کے ساتھ اسٹاف لیول معاہدے کے لیے پرامید ہے۔ گزشتہ دنوں وزیر اعظم نے لندن میں ہونے والی ماحولیاتی کانفرنس میں آئی ایم ایف کی ایم ڈی سے ملاقات کی تھی جس کے بعد پاکستان اور آئی ایم ایف کے درمیان جلد معاہدے کی خبریں سامنے آئی تھیں۔