احتجاج کے نام پر حد سے تجاوز کرنے والوں کو معافی نہیں ملے گی : رانا ثناء

فیصل آباد: پی ٹی آئی حکومت نے پونے 4 سال سیاسی مقدمے اور گالیاں سکھانے پر ضائع کیے۔ پی ٹی آئی حکومت ملک میں سماجی، اخلاقی اور سیاسی بحران لائی۔

فیصل آباد میں مسیحی برادری سے خطاب کرتے ہوئے رانا ثناءاللّٰہ نے کہا کہ 2012 میں بڑے سرمایہ کار پاکستان آنے کےلیے تیار نہیں تھے، عوام نے 2013 میں ہم پر اعتماد کیا تو ہم نے اس ملک سے دہشت گردی اور لوڈشیڈنگ ختم کی۔
رانا ثناءاللّٰہ نے کہا کہ پاکستان میں 2012 میں لوڈشیڈنگ اور دہشت گردی ہو رہی تھی، نواز شریف کی قیادت میں ہم نے لوڈ شیڈنگ اور دہشت گردی سے نجات دلائی۔

انکا کہنا تھا کہ ن لیگ دونوں صوبائی اور قومی حلقے جیتے گی۔ 2018 میں بہت سی قوتوں نے ن لیگ کا راستہ روکنے کی کوشش کی، 2018 میں بھی مسیحی برادری نے بھرپور ساتھ دیا تھا۔

رہنما مسلم لیگ ن نے کہا کہ 2018 میں جس شخص کو لایا گیا اس نے ملک کا بیڑہ غرق کر دیا، امریکا کے دورے پر کہا کہ نواز شریف کی جیل سے اے سی نکلوادوں گا،  اس شخص کے اس رویے کی وجہ سے ملک بدحال ہو گیا، اس شخص نے 9 مئی کو اداروں پر حملہ کیا اور اب لیول پلیئنگ فیلڈ مانگ رہا ہے۔

رانا ثناء نے مزید کہا کہ سیاسی احتجاج اور سیاسی کارکنان کی تحریکوں کی ایک حد ہوتی ہے، پی ٹی آئی بلاشبہ ایک سیاسی جماعت تھی لیکن ان کے لیڈر نے ریڈلائن کراس کروائی، احتجاج کا یہ مطلب نہیں کہ ملکی دفاعی اداروں پر چڑھ دوڑو، اداروں پر حملوں کو سیاسی احتجاج نہیں کہا جاسکتا۔

انکا کہنا تھا کہ احتجاج کے نام پر حد سے تجاوز کرنے والوں کو معافی نہیں ملے گی، شہداء کی یادگاروں کی بے حرمتی کرنے والوں کو معافی نہیں ملے گی۔

انہوں نے مزید کہا کہ شہباز شریف نے اسمبلی میں کھڑے ہو کر مل بیٹھنے کی بات کی، اس شخص نے جواب دیا تھا کہ تم لوگوں کو جیلوں میں ڈالوں گا۔

 ن لیگی رہنما نے کہا کہ پی ٹی آئی حکومت نے پونے 4 سال سیاسی مقدمے اور گالیاں سکھانے پر ضائع کیے۔ پی ٹی آئی حکومت ملک میں سماجی، اخلاقی اور سیاسی بحران لائی۔

رانا ثناء اللّٰہ کا کہنا تھا کہ الیکشن کی آمد آمد ہے، ہر کوئی کہہ رہا ہے الیکشن ن لیگ جیتے گی۔ اب ہم کہہ رہے ہیں کہ ملک کو بحران سے نکالیں گے۔

انہوں نے یہ بھی کہا کہ آئی ایم ایف کی شرائط کی وجہ سے عام آدمی کا گزارہ مشکل ہو رہا ہے۔ الیکشن جیت کر عام آدمی کی زندگی کو آسان بنانے کے اقدامات کریں گے۔ الیکشن جیت کر ملک کی پھر سے خدمت کریں گے۔

رانا ثناء اللّٰہ کا کہنا تھا کہ تمام مسیحی برادری سے کہتا ہوں کہ الیکشن میں ہمارا ساتھ دیں۔ صرف پنجاب سے نہیں پورے پاکستان سے جیتنا ضروری ہے۔