دمشق: اسرائیلی بمباری کے دوران دمشق کا علاقہ المزہ دھماکوں سے گونج اٹھا
اسرائیلی جنگی طیاروں نے شام کےدارالحکومت دمشق میں ایرانی سفارتی تنصیبات پر میزائلوں سے حملہ کردیا، حملے میں ایران کی القدس بریگیڈز کے کمانڈر سمیت 8 افراد جاں بحق ہوگئے۔
عرب میڈیا کی رپورٹ کے مطابق میزائل حملے کے باعث ایرانی قونصل خانے کی عمارت مکمل طور پر تباہ ہوگئی۔
شام کے دارالحکومت دمشق میں اسرائیلی جنگی طیاروں کا ایرانی سفارتخانے کے نزدیک میزائل حملہ کیا، حملے میں ایران کی پاسداران انقلاب کی القدس بریگیڈز کے کمانڈر محمد رضا زاہدی سمیت 8 افراد جاں بحق ہوئے۔
ایران کے سرکاری میڈیا نے دمشق میں سفارتکاروں کی ہلاکت کی تصدیق کی ہے اور کہا ہے کہ دمشق میں اسرائیلی حملے میں متعدد ایرانی سفارتکار بھی جاں بحق ہوئے۔
میزائل حملے میں ایرانی سفارت خانے کے نزدیک عمارت کو نقصان پہنچا، میزائل حملے سے عمارت کے پاس کھڑی گاڑیاں بھی تباہ ہوگئیں۔
ایرانی میڈیا کے مطابق اسرائیل کے میزائل حملے میں ایرانی قونصلیٹ، ایرانی سفیرکی رہائش گاہ کو نقصان پہنچا ہے، ایرانی سفیر محفوظ رہے۔
