آیا صوفیہ مسجد کو جمعے سے عبادت کے لیے کھول دیا جائے گا

استنبول: ترک صدر رجب طیب اردوان آیا صوفیہ کے مسجد میں تبدیل ہونے کے بعد وہاں کا دورہ

صدارتی دفتر سے جاری بیان میں کہا گیا کہ آیا صوفیہ کے دورے کے دوران رجب طیب اردوان نے وہاں کی جانے والی تبدیلی کے کام کا جائزہ لیا۔

ترک صدر رجب طیب اردوان جمعہ24 جولائی کو آیا صوفیہ میں نماز جمعہ ادا کرنے والے 500 افراد کے ساتھ شامل ہونے کا ارادہ رکھتے ہیں۔

گزشتہ ہفتے انقرہ میں ترک سپریم عدالت نے اپنے فیصلے میں کہا تھا کہ اس جگہ کا مسجد کے لیے تعین کردیا گیا تھا اس لیے اس کو قانونی طور پر کسی اور مقصد کے لیے استعمال کرنا ممکن نہیں ہے۔

جس کے بعد11 جولائی کو ترک صدر رجب طیب اردوان نے آیا صوفیہ مسجد کو عدالتی فیصلے کے بعد بحال کرتے ہوئے نماز کے لیے کھولنے کا اعلان کیا تھا۔

طیب اردوان نے کہا تھا کہ آیا صوفیہ مسجد کی انتظامیہ کو مذہبی امور کے ڈائریکٹریٹ کے حوالے کرنے کا فیصلہ کیا گیا ہے اور یہ عبادت کے لیے کھلی ہوگی۔

ترک مذہبی اتھارٹی دیانیت نے کہا کہ نماز کے اوقات کے دوران مسیحی علامات پر مناسب طریقے سے پردہ ڈالا جائے گا۔

چھٹی صدی میں بننے والی عمارت کو 1935 میں میوزیم بنائے جانے کے بعد سے لوگوں کے عقائد سے قطع نظر تمام افراد کے لیے کھولا گیا تھا۔

بعدازاں رواں ہفتے دیانیت نے کہا تھا کہ نماز کے اوقات کے علاوہ آیا صوفیہ تمام افراد کے لیے کھلا ہوگا۔

دنیا بھر کے سیاحوں کے لیے اہم مقام آیا صوفیہ کو پہلی بار عیسائی بازنطینی سلطنت میں ایک گرجا گھر کے طور پر تعمیر کیا گیا تھا تاہم 1453 میں سلطنت عثمانیہ کے قسطنطنیہ پر فتح کے بعد سے اسے مسجد میں تبدیل کردیا گیا تھا۔

جس کے بعد جدید ترکی کے سیکیولر بانی مصطفیٰ کمال اتاترک نے اپنی حکمرانی کے ابتدائی دنوں میں ہی آیا صوفیہ مسجد کو میوزیم میں تبدیل کردیا تھا۔

گزشتہ برس ترک صدر نے کہا تھا کہ آیا صوفیہ کو میوزیم میں تبدیل کرنا ‘ بہت بڑی غلطی’ تھی۔

تاہم یونان نے اس اقدام کو اشتعال انگیز قرار دیتے ہوئے اس کی مذمت کی جبکہ فرانس نے اس پر ناراضی کا اظہار کیا اور امریکا نے بھی مایوسی ظاہر کی۔

روس کے نائب وزیر خارجہ الیگزنڈر گروشکو نے کہا تھا کہ ماسکو کو اس فیصلے پر افسوس ہے۔

گرجا گھروں کی عالمی کونسل نے ترکی کے صدر رجب طیب اردوان سے مطالبہ کیا کہ وہ آیا صوفیہ میوزیم کو مسجد میں تبدیل کرنے کے اپنے فیصلے کو واپس لیں۔