علی ظفر کے خلاف توہین عدالت کی کارروائی

لاہور : عدالت نے علی ظفر کے خلاف عفت عمر کی توہین عدالت کی درخواست نمٹا دی

لاہور کی سیشن کورٹ نے اداکارہ عفت عمر کی جانب سے گلوکار علی ظفر کے خلاف دائر کردہ توہین عدالت کی درخواست کو نمٹاتے ہوئے اداکارہ کو مشورہ دیا کہ وہ مذکورہ معاملے میں گلوکار کے خلاف پولیس میں مقدمہ دائر کروا سکتی ہیں۔

عفت عمر کی علی ظفر کے خلاف توہین عدالت کی کارروائی کرنے کی درخواست پر سماعت ایڈیشنل سیشن جج ظفر رانجھا نے کی۔

عدالت میں گلوکارہ میشا شفیع کے وکیل سید ثاقب جیلانی نے عفت عمر کی جانب سے درخواست دائر کی، جس میں عدالت سے استدعا کی گئی تھی کہ علی ظفر کے خلاف توہین عدالت کی کارروائی کی جائے۔

عفت عمر کی جانب سے دائر کردہ درخواست میں کہا گیا تھا کہ گزشتہ سماعت کے دوران (19 جنوری) کو علی ظفر کے مداحوں نے انہیں عدالتی احاطے میں ہراساں کیا اور ان کے خلاف نعرے بازی کرنے سمیت گروپ کی صورت میں ان کی گاڑی تک گئے۔

درخواست میں دعویٰ کیا گیا کہ علی ظفر کے مداحوں نے میشا شفیع کی گواہ کو ہراساں کرکے انہیں خاموش کرانے کی کوشش کی جب کہ درخواست میں یہ بھی کہا گیا کہ عفت عمر کے خلاف سوشل میڈیا پر جھوٹی مہم چلائی جا رہی ہے۔
درخواست میں دلیل دی گئی تھی کہ گواہوں کو ہراساں کرنا عدالتی کارروائی میں خلل ڈالنے کے برابر ہے، اس لیے علی ظفر کے خلاف توہین عدالت کے تحت کارروائی کی جائے۔

عفت عمر کے وکیل کی درخواست پر علی ظفر کے وکیل نے عدالت کو یقین دہانی کرائی کے آئندہ ایسا نہیں ہوگا اور عدالتی احاطے میں ایسا نہیں ہونا چاہیے تھا۔

علی ظفر کے وکیل نے عدالت کو بتایا کہ اداکارہ کی مذکورہ درخواست عدالتی کارروائی میں خلل ڈالنے کی کوشش ہے۔

عدالت نے علی ظفر کے وکیل کی جانب سے یقین دہانی کرائے جانے پر عفت عمر کی توہین عدالت کی درخواست نمٹاتے ہوئے انہیں تجویز دی کہ وہ خود کو ہراساں کیے جانے کا پولیس میں مقدمہ دائر کروا سکتی ہیں۔

عدالت نے علی ظفر کے خلاف توہین عدالت کی عفت عمر کی درخواست نمٹاتے ہوئے انہیں تجویز دی کہ اگر وہ چاہیں تو خود کو ہراساں کیے جانے پر پولیس میں مقدمہ دائر کرواکر گلوکار کے خلاف فوجداری مقدمہ کر سکتی ہیں۔

عدالت نے عفت عمر کی درخواست نمٹاتے ہوئے انہیں میشا شفیع اور علی ظفر کیس میں جرح مکمل کرنے کے لیے 10 فروری کو طلب کرلیا۔