لاہور: جہانگیر ترین نے کہا ہے کہ وہ جلد وزیر اعظم عمران خان سے ملاقات کریں گے۔
تفصیلات کے مطابق جہانگیر ترین نے آج ضمانت کی درخواست پر کیس کی سماعت کے موقع پر سیشن عدالت کے باہر صحافیوں سے گفتگو کرتے ہوئے کہا کہ جس دن میری افطاری تھی اس سے ایک دن قبل اسلام آباد سے رابطہ کیا گیا تھا، اور یقین دہانی کرائی گئی کہ آپ کے گروپ کی چند دن میں وزیر اعظم سے ملاقات ہوگی۔
جہانگیر ترین نے کہا ٹھنڈی ہوا اسلام آباد سے چلی تو مطمئن ہوئے، اب ہم اس میں رکاوٹ نہیں بنیں گے۔
ہمارے پورے گروپ کی عنقریب وزیر اعظم سے ملاقات ہوگی، خان صاحب سے رشتہ کم زور نہیں ہونا چاہیے۔
انھوں نے کہا میرے خلاف بناوٹی ایف آئی آرز ہیں، کوئی چیز ایف آئی اے کی نہیں، کوئی مدعی شیئر ہولڈرز نہیں، سب مجھ سے خوش ہیں، یہ ایس ای سی پی اور ایف بی آر کے کیسز ہیں۔
جہانگیر ترین کا کہنا تھا جب عمران خان کے ساتھ کھڑا ہوا تو ن لیگ نے میرے کاروبار کی چھان بین کر کے نوٹسز بھیجے، مگر آج سول کیس کو فوج داری کیس میں منتقل کیا گیا، یہ تو ن لیگ نے بھی نہیں کیا تھا۔
انھوں نے کہا کمیٹی کی خبر ٹی وی پر سنی ہم سے کسی نے رابطہ نہیں کیا، چالیس اراکین اسمبلی میرے ساتھ ہیں، جب دوستوں کو بلایا جاتا ہے تو گروپ سے مشورہ کر کے جاتے ہیں۔
