مظلوم فلسطینیوں سے اظہار یکجہتی کی قرارداد متفقہ طور پر منظور کر لی
قومی اسمبلی میں مظلوم فلسطینیوں سے اظہار یکجہتی کی قرارداد متفقہ طور پر منظور کر لی گئی۔
وزیرخارجہ شاہ محمود قریشی کی جانب سے پیش کی گئی قرارداد میں کہا گیا ہے کہ یہ ایوان سرائیل کی انسانی حقوق کی بدترین پامالی کی مذمت کرتا ہے، قبلہ اول کوئی معمولی زمین کا ٹکڑا نہیں ہے، قبلہ اول پریلغاراسلام پرحملہ ہے۔
قرارداد میں کہا گیا ہے کہ فلسطین میں اسرائیلی مظالم پرجنگی جرائم کےتحت مقدمات چلائے جائیں، سلامتی کونسل کی فلسطین سے متعلق قراردادوں پر عمل درآمد کیا جائے، اقوام متحدہ انسانیت کےخلاف مظالم بند کرائے۔
قومی اسمبلی کے اجلاس میں خطاب کرتے ہوئے وزیر خارجہ شاہ محمود قریشی نے کہا کہ آج ترکی روانہ ہوں گا وہاں ترک وزیرخارجہ سےتبادلہ خیال ہوگا، فلسطینی وزیرخارجہ اور سوڈان کے وزیرخارجہ بھی ترکی آئیں گے جہاں سے ہم 4ممالک کے وزرائےخارجہ نیویارک جائیں گے اور اقواممتحدہ دفتر سے جنرل اسمبلی اجلاس بلانے کا مطالبہ کریں گے۔
شاہ محمود قریشی نے کہا کہ مغربی ممالک مسلمانوں پر ہونے والے مظالم پر خاموش ہوتے ہیں لیکن وہاں کے عوام خاموش نہیں، لندن کی سڑکوں پر اسرائیل مظالم کے خلاف بھرپور احتجاج ہوا،فرانس کی حکومت نے پابندی لگائی لیکن وہاں کی عوام نےاحتجاج کیا جرمنی میں بھی اسرائیل کیخلاف احتجاج ہوا، امیدکرتا ہوں یورپی یونین میں انسانیت کے علمبردار ممالک آوازبلند کریں گے۔