شاہ رخ خان کے بیٹے آریان خان کی زندگی کو جیل میں خطرہ

ممبئی: بالی ووڈ اداکار و ناقد کمال راشد نے دعویٰ کیا ہے کہ شاہ رخ خان کے بیٹے آریان خان کی زندگی کو جیل میں خطرہ ہے۔

بھارتی میڈیا رپورٹ کے مطابق بالی ووڈ اداکار کمال راشد نے شاہ رخ خان کے بیٹے آریان خان کی درخواست ضمانت پر فیصلہ محفوظ ہونے کے بعد دعویٰ کیا ہے کہ آریان کی زندگی کو خطرہ ہے۔

کمال راشد نے سماجی رابطے کی ویب سائٹ ٹویٹر پر کروز شپ منشیات کیس میں مزید پیش رفت سامنے آنے کے بعد این سی بی پر تنقید کی۔

انہوں نے لکھا کہ ’این سی بی آر یان خان کو 20 اکتوبر تک جیل میں رکھنے میں کامیاب ہوگئی۔‘

کمال راشد نے لکھا کہ ’مطلب یہ کہ آریان خان کو ایک جہنم سے گزرنا ہے، امید ہے کہ وہ اس ناقابل برداشت درد کو بہادری سے برداشت کرپائیں گے۔‘

انہوں نے مزید لکھا کہ ’میری دعائیں ان کے ساتھ ہیں کیونکہ ان کی زندگی کو خطرہ ہے۔‘

واضح رہے کہ ممبئی کی خصوصی عدالت میں گزشتہ روز آریان خان کی درخواست ضمانت پر سماعت ہوئی تھی، جج نے وکلاء کے دلائل سننے کے بعد فیصلہ محفوظ کر لیا ہے۔

جج کا کہنا تھا کہ محفوظ فیصلہ 20 اکتوبر کو سنایا جائے گا، اُس وقت تک آریان خان جیل میں رہیں گے۔

یاد رہے کہ آریان خان 2 اکتوبر سے پولیس کی حراست میں ہیں، ان پر ممبئی کے کروز شپ تک ممنوعہ منشیات لے جانے کا الزام لگایا گیا ہے۔