نیب احتساب کا نہیں ایک سیاسی انجینئرنگ کا ادارہ بن چکا ہے

لاہور:  آج تک کسی ایک سیاست دان کو نیب سے سزا نہیں ہوئی۔

سابق وزیرِ اعظم شاہد خاقان عباسی کا کہنا ہے کہ نیب احتساب کا نہیں ایک سیاسی انجینئرنگ کا ادارہ بن چکا ہے۔

ان کا کہنا ہے کہ کوئی 50 کروڑ کے گھر اور 6 کروڑ کی گاڑی میں پھرتا ہے تو اس سے پوچھیں کتنا ٹیکس دیا ہے، یہاں کوئی ٹیکس نہیں دیتا۔

شاہد خاقان عباسی نے کہا کہ ہم نے ترامیم دیں کہ جج بنانے سے پہلے اس کے 10 سال کے ٹیکس ریٹرن دیکھیں۔

انہوں نے کہا کہ میرے خلاف کچھ ثابت نہیں ہوا لیکن میں عدالتوں کے چکر لگا رہا ہوں۔

مسلم لیگ نون کے رہنما نے مزید کہا کہ آج ہم اپنے تمام ہمسایوں سے معاشی طور پر پیچھے ہیں، آج برسرِ اقتدار کسی ایک شخص کے خلاف نیب نے کوئی کیس نہیں بنایا۔

شاہد خاقان عباسی کا یہ بھی کہنا ہے کہ نیب کے قوانین باہمی مشاورت سے ٹھیک ہو سکتے ہیں۔