بیان حلفی کیس میں رانا شمیم پر فرد جرم عائد

اسلام آباد ہائی کورٹ نے توہین عدالت کیس میں گلگت بلتستان کے سابق چیف جج رانا شمیم پر فرد جرم عائد کردی۔

تاہم عدالت نے کیس میں نامزد صحافیوں کے خلاف کارروائی مؤخر کر دی۔

سابق چیف جج رانا شمیم نے میڈیا سے گفتگو کرتے ہوئے کہا کہ میرے وکیل ٹریفک میں پھنسے ہوئے ہیں۔ مجھے اکیلا دیکھ کر فرد جرم عائد کی گئی، جس صحافی نے خبر شائع کی اس کو معاف کردیا گیا۔

انہوں نے کہا کہ صحافی نے خبر شائع کرنے سے قبل مجھ سے پوچھا تھا۔ میں نے جواب دیا جب تک بیان حلفی سامنے نہ ہو کچھ نہیں کہہ سکتا۔

صحافی نے سوال کیا کہ کیا آپ ثاقب نثار کے خلاف کوئی شواہد لائیں گے؟ جس پر انہوں نے کہا کہ جب ثاقب نثار جوابی حلف نامہ لائیں گے تب بات ہوگی۔

ان کا کہنا تھا کہ فرد جرم عائد ہونے سے کیا ہوتا ہے۔ فرد جرم سے مراد کسی کو سزا دینا مقصود نہیں ہوتا۔ بیان حلفی سربمہر تھا معلوم نہیں کیسے پبلک ہوا۔