صوبے سے وفاق پر چڑھائی کرنا مناسب نہیں ، یہ قابلِ مذمت عملِ ہے: وزیرِ اعلیٰ بلوچستان

کوئٹہ: دھرنے اور احتجاج سے عوام کو تکلیف ہو رہی ہے۔

وزیرِ اعلیٰ بلوچستان سرفراز بگٹی کا کہنا ہے کہ ایک صوبے سے وفاق پر چڑھائی کرنا مناسب نہیں ہے، اس طرح کا انتشار لمحۂ فکریہ اور قابلِ مذمت ہے۔

سرفراز بگٹی کا کہنا ہے کہ دھرنے اور احتجاج سے عوام کو تکلیف ہو رہی ہے۔

اُنہوں نے کہا کہ بزنس کمیوٹی کے جو مسائل ہم حل کر سکتے ہیں وہ آج ہی حل کرنے کی کوشش کریں گے، بزنس کمیونٹی کے وفاق سے متعلق مسائل پر ان سے بات کریں گے۔

وزیرِ اعلیٰ بلوچستان نے کہا کہ امن و امان کی مجموعی صورتِ حال پر وزیرِاعظم سے بات چیت ہوئی ہے جو قانونی طور پر تجارت کرتے ہیں اس کی حوصلہ افزائی کریں گے۔
اُنہوں نے کہا کہ اسمگلنگ کو قانونی تجارت کا نام نہیں دیا جا سکتا، اسمگلنگ سے انفرادی لوگ فائدہ اٹھاتے ہیں، غیر قانونی تجارت کی حوصلہ شکنی کریں گے، ہم تاجر اور کاروباری افراد کی آواز بنیں گے، اپنی جائز بات منوائیں گے۔

سرفراز بگٹی نے کہا کہ بچے کا اغواء بہت دکھ اور افسوس کی بات ہے، اگر دھرنا دینے سے بچہ بازیاب ہو سکتا تو ہم سب دھرنے میں جا کر بیٹھ جاتے۔