تحریک انصاف نے شہباز شریف سے استعفے کا مطالبہ

سپریم کورٹ کے جج جسٹس اعجاز الاحسن کے گھر پر فائرنگ کے واقعہ کی مذمت کرتے ہوئے تحریک انصاف نے وزیراعلیٰ پنجاب شہباز شریف سے استعفیٰ کا مطالبہ کر دیا۔ تحریک انصاف کے ترجمان فواد چودھری نے میڈیا سے گفتگو کرتے ہوئے کہا ہے کہ اعلیٰ عدلیہ کے جج کے گھر پر فائرنگ منصوبے کے تحت کی گئی ہے، جسٹس اعجازالاحسن کی رہائشگاہ پر براہ راست فائرنگ کی گئی ہے۔ فواد چودھری نے الزام عائد کرتے ہوئے کہا کہ سعد رفیق کے لوکل گینگ سے قریبی تعلق رہے ہیں، رانا ثناء اللہ اور سعد رفیق اس قسم کی وارداتوں کا تجربہ اور مہارت رکھتے ہیں۔ تحریک انصاف مطالبہ کرتی ہے کہ فوری اور جامع تحقیقات کے ذریعے واقعے کی تہہ تک پہنچا جائے اور وزیراعلیٰ پنجاب فوری استعفیٰ دیں۔