پرویز خٹک غیر جانبدار شخصیت کی بجائے من پسند فرد کی تلاش میں ہیں

عوامی نیشنل پارٹی کے صوبائی جنرل سیکرٹری سردار حسین بابک نے صوبے میں نگران وزیراعلٰی کی نامزدگی میں تاخیر پر برہمی کا اظہار کرتے ہوئے کہا ہے کہ وزیراعلٰی اور اپوزیشن لیڈر کی ہٹ دھرمی کی وجہ سے یہ معاملہ ڈیڈلاک کا شکار ہوا ہے۔ اپنے جاری کردہ بیان میں انہوں نے کہا کہ نگران وزیراعظم جسٹس ناصر الملک کا تعلق خیبر پختونخوا سے ہے جو اس بات کا واضح ثبوت ہے کہ ہمارے صوبے میں قابل اور تجربہ کار شخصیات کی کمی نہیں، تاہم اگر ذاتی مفادات سے قطع نظر معاملے کو سنجیدگی سے لیا جائے تو جلد از جلد نمٹایا جا سکتا ہے، لیکن سابق وزیراعلٰی اور سابق اپوزیشن لیڈر غیر جانبدار شخصیت کی بجائے من پسند فرد کی تلاش میں ہیں، دونوں کو صوبے کے مفاد میں سوچنا چاہیئے، فیصلے میں تاخیر سے سولات جنم لے رہے ہیں۔

سرداد حسین بابک نے کہا کہ سابق وزیراعلٰی اور سابق اپوزیشن لیڈر اپنے آئینی اختیارات کا غیر آئینی استعمال کر رہے ہیں، سیاسی رہنماؤں کی جانب سے ذاتی مفادات کو قومی مفاد پر ترجیح دینا افسوسناک اور نیک شگون نہیں۔ انہوں نے کہا کہ سیاسی جماعتوں کیلئے موجودہ وقت لمحہ فکریہ ہے، حیرت اور افسوس کی بات یہ ہے کہ اپوزیشن کی 4 جماعتیں ایک طرف ہیں، جبکہ اپوزیشن لیڈر کی ایک جماعت دوسری جانب کھڑی ہے اور نامزدگی کیلئے اپنے اختیارات کا ناجائز استعمال کرنے کا کوئی موقع ہاتھ سے نہیں جانے دے رہی۔ انہوں نے کہا کہ صوبے میں قابل، دیانتدار، تجربہ کار اور گرانقدر شخصیات کی کمی نہیں، لہٰذا غیر جانبدار شخصیت کو نگران نامزد کر کے اس اہم معاملے کو جلد از جلد نمٹا دیا جائے۔