نواز شریف کو ہرانے والے گستاسب خان کی کامیابی کا نوٹیفکیشن جاری

الیکشن کمیشن کی جانب سے این اے 15 پر میاں نواز شریف سے جیتنے والے امیدوار شہزادہ گستاسب خان کو فارم 49 جاری کیا گیا۔

تفصیلات کے مطابق ریٹرننگ افیسر نے این اے15 مانسہرہ کا فارم 49 جاری کردیا، گستاسب خان نے 105259 ووٹ لے کر کامیابی حاصل کی جبکہ سابق وزیر اعظم میاں محمد نواز شریف 80413 ووٹ لے کر دوسرے نمبر پر رہے۔

خیال رہے کہ 8 فروری کو فروری کو ہونے والے انتخابات میں الیکشن کمیشن کے عملے کی جانب سے فارم 47 جاری ہوا تھا جس پر قائد ن لیگ نوازشریف کی طرف سے الیکشن کمیشن کو فارم 49 روکنے کیلئے عذرداری درخواست دی گئی تھی۔

گزشتہ روز الیکشن کمیشن اسلام آباد سے میاں نوازشریف کی عذرداری درخواست خارج کر دی گئی الیکشن کمیشن نے اپنے فیصلے میں آر او این اے 15 کو فارم 49 جاری کرنے کے احکامات جاری کئے تھے۔