پشاورمیں پولیس نے بس اڈے پرتخریب کاری کا منصوبہ ناکام بنادیا

پشاور: چارسدہ میں باچاخان یونیورسٹی میں دہشت گردوں کے حملے کے بعد پشاورمیں پولیس اورسیکیورٹی ادارے ہائی الرٹ ہیں اسی سبب حاجی کیمپ بس ٹرمینل کے قریب نصب بم ناکارہ بنا دیا۔

تفصیلات کے مطابق دہشت گردوں کی جانب سے چارسدہ کے بعد پشاور میں بھی تخریب کاری کا ایک بڑا منصوبہ بنایا تھا جس کو فورسز نے بروقت ناکام بنادیا۔

فورسز کو پشاور کے حاجی کیمپ بس ٹرمینل کے قریب بم کی موجودگی کی اطلاع ملی جس پرپولیس نے فوری کارروائی کرتے ہوئے علاقے کو گھیرے میں لے لیا اورتلاشی کے دوران ایک تھرماس میں رکھا 4 کلو وزنی بم برآمد کرلیا جسے موقع پرموجود بم ڈسپوزل اسکواڈ کے عملے نے بم کو ناکارہ بنا دیا۔

دوسری جانب سی ٹی ڈی نے کارروائی کرتے ہوئے دہشت گردی کی مختلف کارروائیوں میں ملوث دہشت گرد گرفتارکرلیا جس کا نام فضل الرحمان بتایا جاتا ہے۔