شمالی وزیرستان، بارودی سرنگ کے دھماکہ میں جوانسال لڑکی ہاتھوں سے محروم

شمالی وزیرستان کے سب ڈویژن میرعلی میں بارودی سرنگ کے دھماکہ میں جوانسال لڑکی دونوں ہاتھوں سے محروم ہوگئی۔ مقامی ذرائع کے مطابق 20 سالہ بغدادا دختر تلاوت خان اپنے گھر کے قریب پہاڑی پر آگ جلانے کے لئے لکڑیاں جمع کررہی تھی کہ اس دوران پہلے سے نصب بارودی مواد زوردار دھماکہ سے پھٹ گیا جس کے نتیجہ میں اس کے دونوں ہاتھ ضائع ہوگئے جبکہ جسم کے دیگر حصوں میں بھی گہرے زخم آئیں۔ مقامی افراد کے مطابق مجروحہ کو طبی امداد کے لئے خلیفہ گل نواز ہسپتال بنوں منتقل کردیا گیا ہے جہاں اس کا علاج جاری ہے، انہوں نے کہا کہ متاثرہ لڑکی کا تعلق انتہائی غریب گھرانے سے ہیں لہٰذا حکومت اور دیگر متعلقہ حکام ان کے ساتھ تعاون کریں۔ دوسری جانب واقعے کے بعد قانون نافذ کرنے والے اداروں کے اہلکاروں نے جائے وقوعہ سے شواہد اکٹھے کرکے تفتیش کا آغاز کردیا ہے۔