پارٹی رہنماؤں اور کارکنوں کی ناحق گرفتاریاں زیادتی ہیں : عمران خان

لاہور: پی ٹی آئی چیئرمین عمران خان نے کہا کہ تحریک انصاف کو ختم کرنے کی سازش کبھی کامیاب نہیں ہو سکتی۔

تحریک انصاف نے نو مئی کے واقعات کے الزام میں گرفتار ہونے والے کارکنان کی رہائی کے لیے عدالتوں سے رجوع کرنے کا فیصلہ کیا ہے۔

ایکسپریس نیوز کے مطابق معروف قانون دان حامد خان کی چیئرمین تحریک انصاف عمران خان سے ملاقات ہوئی، جس میں ملک بھر میں جاری پی ٹی آئی کارکنان اور رہنماؤں کے خلاف کریک ڈاؤن پر مشاورت کی گئی۔
سینئر وکیل حامد خان نے چیئرمین تحریک انصاف کو قانونی معاملات کے حوالے سے آگاہ کیا اور اس معاملے میں ہونے والی خلاف ورزیوں کو اجاگر کیا۔
عمران خان نے گفتگو کرتے ہوئے کہا کہ پارٹی رہنماؤں اور کارکنوں کی ناحق گرفتاریاں زیادتی ہیں، تحریک انصاف کو ختم کرنے کی سازش کبھی کامیاب نہیں ہو سکتی ۔
چیئرمین پی ٹی آئی نے کارکنوں اور رہنماؤں کی گرفتاریوں کے لیے عدالت سے رجوع کرنے کی بھی ہدایت کی۔ سینئر قانون دان نے میڈیا سے مختصر گفتگو میں تصدیق کی کہ کارکنان کی رہائی کے لئے وکلا عدالتوں سے رجوع کر رہے ہیں۔