پرویز مشرف اتنے ہی بہادر ہیں تو آکر عدالتوں کا سامنا کریں، آصف زرداری

کمالیہ: پیپلز پارٹی کے شریک چیرمین اور سابق صدر آصف علی زرداری نے کہا ہے کہ پرویز مشرف اتنے ہی بہادر ہیں تو ملک آکر عدالتوں کا سامنا کریں۔ کمالیہ میں پریس کانفرنس کرتے ہوئے سابق صدر آصف علی زرداری نے کہا کہ ہمارے ملک میں الزام لگانے والے پر الزام لگا دینا ہی بہترین دفاع مانا جاتا ہے، پرویزمشرف اتنے ہی بہادر ہیں تو عدالت آئیں اور پیش ہوں، اگر ان کی کمر میں اتنی ہی تکلیف ہے تو پھر ناچ گانے کیسے کررہے ہیں، ہم مشرف کے خلاف عدالت گئے ہیں تو اب ان کو یہ الزام یاد آیا ہے، مرتضی ٰبھٹو کے قتل کے وقت بھی مجھ پر اور بی بی پر الزام لگایا گیا تھا، بینظیر نے جواب میں کہا کہ ایک بھٹو کو قتل اور دوسرے بھٹو کو نشانہ بنانا چاہتے ہیں۔
آصف زرداری کا نااہل ہونے والے وزیر اعظم نواز شریف اور مسلم لیگ (ن) کے حوالے سے کہنا تھا کہ میں نے کہا تھا کہ چار سال انہیں حکومت کرنے دوں گا پھر حساب لوں گا، تاریخ نے ثابت کردیا کہ ان کو نہ حکومت کرنی آتی ہے نہ ہی وہ معاملات سنبھال سکتے ہیں، یہ لوگ کہیں گے کہ چونکہ ہمیں نکالا گیا اس لیے معیشت کمزور ہورہی ہے، یہ لوگ بھارتی لابی سے ملے ہوئے ہیں اور کاروباری مفاد دیکھ کر سوچتے ہیں، وزیر خزانہ اسحاق ڈار پاکستان کو زخمی حالت میں چھوڑ کر فرار ہوگئے، لاقانونیت کی وجہ سے معاشی زبوں حالی ہے، صرف روڈ بنانے سے کچھ نہیں ہوتا۔
آصف زرداری نے سینیٹ میں انتخابی اصلاحات کی شق منظور کرانے میں (ن) لیگ کا ساتھ دینے کی تردید کرتے ہوئے کہا کہ خیبرپختون خوا میں کوئی ترقی نظر نہیں آتی۔ عمران خان کے سیاسی مستقبل سے متعلق سوال کے جواب میں آصف زرداری نے کہا کہ عمران خان کو کرکٹ ٹیم کا کوچ بنتے دیکھ رہا ہوں۔