24 نومبر کے احتجاج کرنے والوں میں 100 تربیت یافتہ شرپسند تھے
گرفتار 1150 افراد میں سے 89 کا پاکستان میں ڈیٹا ہی موجود نہیں ، ڈی پی او اٹک
اٹک: مظاہرین نے پولیس پربرازیلی ساختہ آنسو گیس شیل پھینکے، یہ شیل پاکستانی شیل سے چار گنا طاقتور تھے۔
پنجاب کے ضلع اٹک کے ضلعی پولیس آفیسر (ڈی پی او) ڈاکٹر غیاث گل نے پریس کانفرنس کرتے ہوئے کہا ہے کہ ہے 24 نومبر کو احتجاج کرنے والوں میں 100 تربیت یافتہ شرپسند تھے۔
مظاہرین نے پولیس پر کیمیکل بموں سے حملے کیے، برازیلی ساختہ آنسو گیس شیل پھینکے، یہ شیل پاکستانی شیل سے چار گنا طاقتور تھے۔
انہوں نے کہا کہ بلٹ پروف جیکٹس پہنے اور وائرلیس سیٹ سے لیس ان ’مظاہرین‘ نے پولیس کی کمیونیکیشن بلاک کر دی تھی۔
ڈی پی او اٹک نے کہا کہ مظاہرین کے پاس کیمیکل اور بوتلوں سے بھری ایک گاڑی تھی جو ’چلتی پھرتی بم فیکٹری‘ تھی۔
انہوں نے مزید کہا کہ 1150 گرفتار افراد میں سے 89 کا پاکستان میں ڈیٹا ہی نہیں ہے، شبہ ہے کہ ان کا تعلق ایسے ملک سے ہے جس سے پاکستان کے تعلقات ٹھیک نہیں۔
ڈی پی او نے کہا کہ اٹک میں مظاہرین میں سے کوئی ہلاک نہیں ہوا، جھڑپوں میں پولیس کے 147 جوان زخمی ہوئے جن میں سے 25 شدید زخمی ہیں۔
